दाङ । तुलसीपुर उपमहानगरपालिका वडा नम्बर ३ कल्लेमा रहेको नवज्योति सांस्कृतिक युवा क्लबले अभिभावकविहीन बनेका दुई बालकलाई खाद्यान्न तथा नगद सहयोग गरेको छ ।

क्लबका अध्यक्ष धनराज रोकाको नेतृत्वमा गएको टोलीले पीडित परिवारको घरमै पुगेर १६ हजार ५ सय ८५ नगदसहित चामल,तेल लगायतका खाद्यान्न सामग्री हस्तान्तरण गरेको हो । केही वर्षअघि बुवा कमल पुनको निधन भएपछि आमाको सहारामा रहेका दुई बालकले हालै आमासमेत गुमाएका हुन् । विषालु च्याउ खाँदा आमा दीपा पुनको निधन भएपछि उनीहरू पूर्णरूपमा अभिभावकविहीन बनेका छन् । दुवै अभिभावकको निधनपछि बालकहरूको शिक्षा,पालनपोषण तथा दैनिक जीवनयापनमा समस्या देखिएको छ ।

त्यस्तै,उनीहरुको अवस्थाबारे जानकारी पाएपछि देश तथा विदेशमा रहेका नेपालीहरुबाट समेत सहयोग जुटिरहेको छ । विभिन्न व्यक्ति,संघसंस्था तथा सामाजिक अभियन्ताहरुले आफ्नो क्षमताअनुसार सहयोग गर्दै आएका छन् । तर बालकहरुको भविष्य सुरक्षित गर्न निरन्तर सहयोग आवश्यक रहेकाले सहयोगी मन भएका व्यक्ति, संघसंस्था तथा देश–विदेशमा रहेका नेपालीहरुलाई सक्दो सहयोग गरिदिन अपिल गरिएको छ ।

सबैको सानो सहयोगलेपनि अभिभावकविहीन बनेका बालकहरुको शिक्षा,पालनपोषण र भविष्य निर्माणमा ठूलो योगदान पुग्ने भएकाले आ–आफ्नो ठाउँबाट सहयोग गर्न आग्रह समेत गरिएको हो ।