धनगढी । दार्चुलादेखि भारततर्फ अवैधरुपमा निकासी गर्न लागिएको ठूलो परिमाणको झ्याउ प्रहरीले बरामद गरेको छ ।

विशेष सूचनाका आधारमा दुहुँ गाउँपालिका वडा नम्बर ३ कालीगाडस्थित महाकाली नदी किनार क्षेत्रबाट ३९ बोरा झ्याउ बरामद गरिएको हो ।

त्यस्तै,झ्याउ अवैध रुपमा ओसारपसार गरिरहेको अवस्थामा प्रहरीले चार जना स्थानीयलाई पक्राउ गरेको जनाएको छ । पक्राउ पर्नेमा दुहुँ गाउँपालिका–४ का ४१ वर्षीय पवनसिंह कार्की, ४२ वर्षीय रमेशसिंह कार्की, ४१ वर्षीय गोर्खसिंह कार्की र ३२ वर्षीय शैलेन्द्रसिंह कार्की रहेका छन् ।

यस्तै,प्रहरीका अनुसार बरामद झ्याउको तौल १ हजार ३६८ किलोग्राम रहेको छ भने यसको अन्दाजी मूल्य करिब ३ लाख ४२ हजार रुपैयाँ बराबर रहेको छ । बरामद गरिएको अवैध वन पैदावार आवश्यक प्रक्रिया पूरा गरी अपि–नम्पा संरक्षण क्षेत्र दार्चुलाको जिम्मा लगाइएको छ ।उक्त  घटनाबारे थप अनुसन्धान भइरहेको प्रहरीले जनाएको छ ।