दाङ । नेपाली कांग्रेसकी नेतृ तथा लुम्बिनी प्रदेश सभा सदस्य लोका विश्वकर्माले सरकारले स्वास्थ्य तथा कृषि क्षेत्रलाई प्राथमिकतामा राखेको बताए पनि त्यसको प्रभावकारी कार्यान्वयन हुन नसकेको भन्दै चिन्ता व्यक्त गरेकि छिन् ।

लुम्बिनी प्रदेश सभालाई सम्बोधन गर्दै सांसद विश्वकर्माले स्वास्थ्य र कृषि क्षेत्र जनजीवनसँग प्रत्यक्ष रूपमा जोडिएका महत्वपूर्ण क्षेत्र भएकाले यी क्षेत्रमा घोषणा गरिएका कार्यक्रम प्रभावकारी रूपमा कार्यान्वयन हुनुपर्ने बताइन् । उनले बजेट तथा योजनामा प्राथमिकता दिइए पनि त्यसको प्रतिफल नागरिकले अनुभूति गर्न नसकेको उल्लेख गरिन् ।

सांसद विश्वकर्माले विशेषगरी पछाडि पारिएका, विपन्न तथा पहुँचविहीन समुदायका नागरिकहरुको जीवनस्तर सुधारका लागि सरकारले थप पहल गर्नुपर्ने आवश्यकता औंल्याइन् । राज्यका सेवा, सुविधा र विकासका अवसरबाट वञ्चित रहेका समुदायसम्म सरकारी कार्यक्रम पुग्नुपर्नेमा उनले जोड दिइन् ।

त्यस्तै,उनले स्वास्थ्य सेवामा सबै नागरिकको सहज पहुँच सुनिश्चित गर्न, कृषि क्षेत्रलाई उत्पादनमुखी र व्यावसायिक बनाउन तथा ग्रामीण क्षेत्रमा रहेका नागरिकको जीवनयापन सहज हुने गरी सरकारले ठोस कार्यक्रम सञ्चालन गर्नुपर्ने बताइन् ।

यस्तै,सांसद विश्वकर्माले विकास र समृद्धिको लक्ष्य हासिल गर्न सरकारको ध्यान स्वास्थ्य,कृषि तथा सामाजिक रुपमा पछाडि परेका समुदायको उत्थानतर्फ केन्द्रित हुनुपर्ने धारणा व्यक्त गर्दै नागरिकको जीवनमा सकारात्मक परिवर्तन ल्याउने खालका कार्यक्रम प्रभावकारी रुपमा कार्यान्वयन गर्न सरकारलाई आग्रह गरिन् ।