दाङ । देउखुरीको गढवा गाउँपालिकाले विद्यालय तहमा व्यक्तिगत घटना दर्ता सम्बन्धी अभिमुखीकरण तालिम सम्पन्न गरेको छ ।

मङ्गलबार वडा नम्बर १ स्थित जनता माध्यमिक विद्यालय कालाकाटे र जनमुखी माध्यमिक विद्यालय रङसिङमा व्यक्तिगत घटना दर्ता सम्बन्धी अभिमुखीकरण तालिम सम्पन्न गरेको हो ।

पञ्जीकरण शाखा प्रमुख ऋषिराम यादवले जनता माध्यमिक विद्यालय कालाकाटे र जनमुखी माध्यमिक विद्यालय रङसिङमा कक्षा १० मा अध्ययनरत विद्यार्थीहरुलाई पञ्जीकरण सम्बन्धी तालिम दिइएको जानकारी दिए । उनका अनुसार विद्यार्थीहरुलाई जन्म,मृत्यु,विवाह,सम्बन्धविच्छेद तथा बसाइँसराई सम्बन्धी घटना दर्ताको महत्व, कानुनी व्यवस्था तथा व्यवहारमा देखिने समस्याका समाधानका विषयमा जानकारी गराइएको थियो।

कार्यक्रममा ऋषिराम यादव र मधुसुदन पौडेलले सहभागी विद्यार्थीहरुलाई व्यक्तिगत घटना दर्ता समयमै गर्नुपर्ने आवश्यकता तथा त्यसले नागरिकको अधिकार सुनिश्चित गर्न पुर्‍याउने योगदानबारे अभिमुखीकरण गर्नुभएको थियो । जनता माध्यमिक विद्यालय कालाकाटेका प्रधानाध्यापक नेत्र प्रसाद खनालले विद्यालय तहबाटै विद्यार्थीहरुलाई व्यक्तिगत घटना दर्ता सम्बन्धी जानकारी दिनु अत्यन्त सकारात्मक कार्य भएको बताए । उनले “यस्ता कार्यक्रमले विद्यार्थीमार्फत समुदायसम्म सचेतना फैलिने भएकाले घटना दर्ता सम्बन्धी समस्या न्यूनीकरणमा सहयोग पुग्ने विश्वास लिएका छौं,” भने ।

त्यस्तै जनमुखी माध्यमिक विद्यालय व्यवस्थापन समितिका अध्यक्ष सुव बहादुर कुमाल ले नागरिकका आधारभूत अधिकारसँग जोडिएको घटना दर्ता सम्बन्धी जानकारी विद्यालयस्तरमै दिनु प्रभावकारी भएको बताए । उनले “विद्यार्थीहरु भविष्यका जिम्मेवार नागरिक भएकाले उनीहरुलाई यस्ता विषयमा सचेत बनाउन सके समाजमा सकारात्मक परिवर्तन आउँछ,” भने ।

जनता माध्यमिक विद्यालय कालाकाटेका प्रधानाध्यापक नेत्र प्रसाद खनालको अध्यक्षतामा सम्पन्न कार्यक्रममा सहायक प्रधानाध्यापक प्रेम नारायण भुसाल लगायतको सहभागिता रहेको थियो । त्यसैगरी जनमुखी माध्यमिक विद्यालय रङसिङमा सम्पन्न कार्यक्रममा विद्यालय व्यवस्थापन समितिका अध्यक्ष सुव बहादुर कुमालको अध्यक्षता रहेको थियो ।

कार्यक्रममा विद्यालयका प्रधानाध्यापक ज्ञानहरी रिजाल, सहायक प्रधानाध्यापक देवेन्द्र पोख्रेल, शिक्षा अधिकृत गोविन्द न्यौपाने लगायतको सहभागिता रहेको थियो । कार्यक्रमको सहजीकरण गढवा गाउँपालिका पञ्जीकरण शाखा प्रमुख ऋषिराम यादवले गरेका थिए ।