दाङ । दाङसहित देशका विभिन्न स्थानीय तहमा सातामा दुई दिन विद्यालय बन्द गर्ने अभ्यास बढ्दै गएपछि अभिभावकहरुबाट गुनासो आउन थालेको छ ।

विशेषगरी शनिबारसँगै आइतबार पनि विद्यालय बन्द हुँदा विद्यार्थीको पढाइ प्रभावित भएको भन्दै अभिभावकहरुले चिन्ता व्यक्त गरेका छन् । शिक्षा क्षेत्र स्थानीय सरकारको अधिकारभित्र पर्ने विषय भए पनि धेरै स्थानीय तहहरु यस विषयमा स्पष्ट निर्णय लिन नसकेको देखिएको छ । स्थानीय जनप्रतिनिधिहरुले केन्द्र सरकारको नीतिविपरीत जान नसकिने भन्दै मौन बस्ने गरेका छन् ।

‎यता दाङको घोराही उपमहानगरपालिकाभित्र भने आइतबार पनि विद्यालय सञ्चालन भइरहेको छ । घोराहीका अधिकांश सामुदायिक तथा संस्थागत विद्यालयहरु नियमित रुपमा आइतबार खुल्ने गरेका छन् । तर अन्य केही पालिकाहरुमा भने आइतबार विद्यालय बन्द गरिँदै आएको छ,जसले एउटै जिल्लाभित्र फरक अभ्यास देखिएको छ । ‎अभिभावकहरुका अनुसार बारम्बार बिदा हुँदा विद्यार्थीहरु मोबाइल तथा सामाजिक सञ्जालमा बढी समय बिताउन थालेका छन् ।

त्यस्तै,विद्यालय सञ्चालन दिन घट्दा पाठ्यक्रम समयमै सक्न समस्या हुने र शैक्षिक गुणस्तरमा समेत असर पर्ने उनीहरुको भनाइ छ । ग्रामीण क्षेत्रका अभिभावकहरुले भने विद्यालय बन्द हुँदा बालबालिका घरमै अलमलिने अवस्था रहेको बताएका छन् । ‎शिक्षाविदहरुले यस विषयमा देशभर एउटै स्पष्ट नीति आवश्यक रहेको बताएका छन् । कतै दुई दिन बिदा र कतै एक दिन मात्रै बिदा हुँदा अभिभावक,विद्यार्थी र विद्यालय सबै अन्योलमा परेको उनीहरुको भनाइ छ । यसले शिक्षा क्षेत्रमा नीति र व्यवहारबीच असमानता देखिएको सरोकारवालाहरुको भनाइ छ ।
‎