kkc

तेहरान । इजरायलले शनिबार आज बिहान इरानको राजधानी तेहरानसहित धेरै सहरहरुमा हमला गरेको छ । इर्ना समाचार एजेन्सीका अनुसार हमलामा दक्षिणी इरानमा ४० जना छात्राको मृत्यु भएको छ भने ४५ जना घाइते भएका छन् ।

यसको जवाफमा इरानले पनि इजरायलमा जवाफी हमला सुरु गरेको छ । मिडिया रिपोर्टका अनुसार इरानले पलटवार गर्दै करिब ४०० मिसाइल प्रहार गरेको छ । इरानले इजरायलका साथै कुवेत, कतार, बहराइन र साउदी अरबमा रहेका अमेरिकी सैन्य अखडाहरुमा पनि हमला गरेको छ । इरानले यूएईको सबैभन्दा धेरै जनसंख्या भएको सहर दुबईलाई पनि निशाना बनाएको छ । खासमा इजरायलले इरानको खुफिया मन्त्रालय,रक्षा मन्त्रालय,सर्वोच्च नेता खामेनेईको कार्यालय र इरानको परमाणु ऊर्जा संगठनलाई निशाना बनाएको थियो । हमलापछि खामेनेईलाई सुरक्षित स्थानमा सारिएको छ ।

इजरायलले इरानविरुद्ध आफ्नो नयाँ अभियानको नाम ‘लायन्स रोर’ राखेको छ । अल जजिराले अमेरिकी अधिकारीहरुलाई उद्धृत गर्दै यो अमेरिका र इजरायलको संयुक्त सैन्य कारबाही भएको बताएको छ । यो हमला इरान र अमेरिकाबिच परमाणु हतियारको विषयमा चलिरहेको वार्ताको बिचमा भएको हो ।

यस्तै अमेरिकी राष्ट्रपति डोनाल्ड ट्रम्पले इरानमा हमला गर्ने धम्की दिएका थिए । उनले यो कारबाहीको उद्देश्य अमेरिका र उसका जनतालाई खतराबाट बचाउनु रहेको बताएका छन् । ट्रम्पका अनुसार अमेरिकी सेना इरानका मिसाइलहरुलाई नष्ट गर्न र त्यसको मिसाइल कार्यक्रम समाप्त गर्ने प्रयास गरिरहेको छ ।