lms

दाङ । पहिलोपटक प्रतिनिधि सभा निर्वाचनमा सहभागी हुन लागेको विप्लव नेतृत्वको नेकपा (माओवादी) ले दाङका तिनवटै निर्वाचन क्षेत्रमा आफ्ना उम्मेदवारको टुंगो लगाएको छ ।

पार्टीले दाङका ३ वटै निर्वाचन क्षेत्रमा एकल सिफारिस गरेको हो । दाङ निर्वाचन क्षेत्र नम्बर १ बाट पार्टीका केन्द्रीय सदस्य प्रकाश शाहीलाई एकल उम्मेदवारका रुपमा सिफारिस गरिएको छ।

उनी अखिल (क्रान्तिकारी)का निवर्तमान अध्यक्ष समेत हुन् । भ्रष्टाचार बिरोधि अभियान्ता शाही देउखुरी क्षेत्रका ऊर्जाशील युवा नेताका रुपमा परिचित रहेका छन् । राजनीति शास्त्रमा एमफिल उत्तीर्ण शाही हाल धानखोला–लमही चारलेन सडक संघर्ष समितिको संयोजकका रुपमा अभियान सञ्चालन गरिरहेका छन् ।

त्यसैगरी,दाङ निर्वाचन क्षेत्र नम्बर २ बाट लामो समयदेखि पार्टीको केन्द्रीय सदस्यका रुपमा सक्रिय बालकृष्ण पोखरेल (सविन) लाई एकल उम्मेदवारका रुपमा सिफारिस गरिएको छ । दाङ जिल्ला इञ्चार्जको जिम्मेवारी सम्हालिरहेका सविन यस क्षेत्रका अनुभवी र परिचित नेतामध्य पर्छन् ।

त्यस्तै पार्टीले दाङ निर्वाचन क्षेत्र नम्बर ३ बाट पार्टीका पोलिटब्युरो सदस्य बलबहादुर वली (शीतल) लाई पनि एकल उम्मेदवारका रुपमा अघि सारेको छ । माओवादी जनयुद्धकालदेखि नै भूमिगत तथा सक्रिय राजनीतिमा संलग्न शीतललाई पार्टीले अनुभवी नेतृत्वका रुपमा विश्वास गर्दै सिफारिस गरेको हो ।

पहिलो सहभागितामै तीनै क्षेत्रमा एकल उम्मेदवार सिफारिस गर्ने माओवादीको निर्णयलाई राजनीतिक वृत्तमा सकारात्मक रुपमा हेरिएको छ। स्पष्ट उम्मेदवारी,अनुभव र संगठनात्मक बलका आधारमा माओवादीले दाङमा आफ्नो उपस्थितिलाई प्रभावकारी बनाउने संकेत दिएको विश्लेषण गरिएको छ ।