सुनसरी । फेसबुक अकाउन्ट ह्याक गरेर ठगी गरेको आरोपमा सुनसरी प्रहरीले झापाको भद्रपुरबाट ३ जनालाई पक्राउ गरेको छ ।
त्यस्तै पक्राउ पर्नेमा झापाको भद्रपुर नगरपालिका वडा नम्बर ६ घर भएका १९ वर्षका आशिष विष्ट, १९ वर्षीय प्रवीण राजवंशी र १८ वर्षका भावेश राजवंशी छन् ।
सुनसरीको इटहरी उप-महानगरपालिका वडा नम्बर–२ बस्ने डिल्लीबहादुर राउतको अकाउन्ट ह्याक गरेर उनीहरुले रकम ठगेको अनुसन्धानबाट थाहा भएको छ । फेसबुक अकाउन्ट ह्याक गरेर आरोपीहरुले पीडितको म्यासेन्जरबाट पीडितकै साथीहरुलाई आफु ‘समस्यामा परेको’ भनेर म्यासेज पठाएर ठग्ने गरेको जिप्रका सुनसरीका डिएसपी राजकुमार राईले बताए ।
म्यासेन्जर दुरुपयोग गरेर आरोपीहरुले इसेवा आईडीमा रकम पठाउन आग्रह गरेर ठग्ने गरेका थिए । भदौ १ मा झापाको भद्रपुरबाट पक्राउ गरेर जिल्ला प्रहरी कार्यालय सुनसरीले उनीहरुबारे अनुसन्धान गरिरहको छ । सफ्टवेयर बनाएर सामाजिक सञ्जालमा ‘ब्युटी कन्टेस्ट’ मा भोट दिन आग्रह गरेर पीडितलाई झुक्याएर अकाउन्टमा अनधिकृत प्रवेश गर्ने गरेको अनुसन्धानबाट खुलेको छ ।
त्यस्तै फेसबुकको पासवर्ड चोरी गरेर आरोपीहरुले बिरामी भएको बहना बनाएर रकम माग्ने गरेका थिए । उनीहरुले अहिलेसम्म २५ वटा अकाउन्ट ह्याक गरेर २ लाखभन्दा बढी रकम ठगेको अनुसन्धानबाट थाहा भएको डिएसपी राईले जानकारी दिए ।