दाङ । नेपाली काङ्ग्रेसले २०८२ साल चैत १० र ११ गते सम्पन्न केन्द्रीय कार्यसमिति बैठकको निर्णय अनुसार देशभर निर्वाचन समीक्षा कार्यक्रम सञ्चालन गर्ने भएको छ ।

लुम्बिनी प्रदेशमा नेपाली काङ्ग्रेसका सहमहामन्त्री योगेन्द्र चौधरीलाई जिम्मेवारी तोकिएको छ । यहीँ चैत २९ गते दाङको राप्ती गाउँपालिका स्थित भालुवाङमा कार्यक्रमको आयोजना गरिएको छ । सो कार्यक्रममा नेपाली काङ्ग्रेसका पार्टी सभापति गगन कुमार थापा आउने कार्यक्रम तय भएको सहमहामन्त्री चौधरीले जानकारी दिए ।

पार्टीले “निर्वाचन समीक्षा र काङ्ग्रेसको अबको बाटो” शीर्षकमा सातै प्रदेशमा कार्यक्रम आयोजना गर्ने निर्णय गरेको हो । उक्त कार्यक्रम अन्तर्गत प्रतिनिधि सभा अन्तर्गतका १ सय ६५ वटै निर्वाचन क्षेत्रमा उम्मेदवारहरुसँग समिक्षात्मक छलफल गरिनुका साथै केन्द्रीय प्रतिनिधिको उपस्थितिमा क्षेत्रगत अध्ययन र समीक्षा गरिने जनाइएको छ ।

निर्धारित मिति र स्थान अनुसार सम्बन्धित प्रदेशहरुमा कार्यक्रम सञ्चालन गरिनेछ । कार्यक्रमलाई प्रभावकारी बनाउन प्रत्येक प्रदेशमा तोकिएका संयोजकसँग आवश्यक समन्वय गरिने पार्टीले जनाएको छ । यस कार्यक्रम अन्तर्गत केन्द्रीय कार्यसमितिका सदस्यहरु, प्रदेश कार्यसमितिका पदाधिकारीहरु,जिल्ला सभापतिहरु, प्रतिनिधि सभा क्षेत्रीय सभापतिहरु, प्रदेश सभा सदस्यहरु,प्रदेश सभा क्षेत्रीय सभापतिहरु तथा प्रतिनिधि सभाका प्रत्यक्ष र समानुपातिक तर्फका उम्मेदवारहरुको सहभागिता रहनेछ ।

त्यस्तै कार्यक्रम व्यवस्थापनको जिम्मेवारी सम्बन्धित जिल्ला कार्यसमितिलाई दिइएको जनाइएको छ । नेपाली काङ्ग्रेसले यस कार्यक्रममार्फत हालै सम्पन्न निर्वाचनको समग्र समीक्षा गर्दै आगामी रणनीति तय गर्ने लक्ष्य राखेको बताइएको छ ।