दाङ । जनता माध्यमिक विद्यालय कालाकाटेमा लामो समयदेखि कार्यरत वरिष्ठ शिक्षक गढवा गाउँपालिका वडा नम्बर १ निवासी देवलाल यादवलाई एक विशेष कार्यक्रमका बीच उच्च सम्मानका साथ बिदाइ गरिएको छ ।
‎
‎वि.सं. २०४२ सालबाट शिक्षण पेशामा प्रवेश गरेका यादवले वि.सं. २०५५ पुस २१ गतेदेखि २०८३ जेठ १६ गतेसम्म जनता माध्यमिक विद्यालय कालाकाटेमा निरन्तर रुपमा सेवा प्रदान गरेका थिए । करिब तीन दशकसम्म विद्यालयमा रही उनले हजारौँ विद्यार्थीको शैक्षिक, नैतिक तथा व्यक्तित्व विकासमा महत्वपूर्ण योगदान पुर्‍याएका छन् ।
‎
‎बिदाइ कार्यक्रममा विद्यालय व्यवस्थापन समिति, शिक्षक, कर्मचारी,विद्यार्थी तथा अभिभावकहरुले उनको समर्पण, अनुशासन, इमान्दारिता र शिक्षाप्रतिको निष्ठाको उच्च प्रशंसा गरेका थिए । वक्ताहरुले यादवले विद्यालयको शैक्षिक उन्नयन र गुणस्तरीय शिक्षाका लागि पुर्‍याएको योगदान सधैं स्मरणीय रहने बताएका थिए ।
‎
‎कार्यक्रममा सम्मानपत्र,मायाको चिनो तथा खादा ओढाई उहाँप्रति सम्मान व्यक्त गरिएको थियो। बिदाइ मन्तव्य व्यक्त गर्दै यादवले विद्यालय परिवारप्रति आभार प्रकट गर्दै आफ्नो कार्यकालमा प्राप्त सहयोग, सद्भाव र मायाप्रति धन्यवाद ज्ञापन गरेका थिए ।
‎
‎त्यस्तै,शिक्षा क्षेत्रमा लामो समयसम्म पुर्‍याएको अतुलनीय योगदानका लागि उनको आगामी जीवन सुख, स्वास्थ्य र सफलताले भरिपूर्ण रहोस् भन्ने शुभकामना व्यक्त गरिएको थियो ।
‎