Jmg

Rms

mmsb

Rgs

mbd

nakb

apb

tvs

१.
खुला किताब जिन्दगी, झलल्ल झल्कियोस् सफा
इमानको विमानमा विराजमान यो कथा
समग्र विश्व शान्तिको, विकासको कुरा गरी
सुधार होस् विचारमा उदार भावना भरी ।

२.
तनावहीन स्वादिलो छ वर्तमानको कुरा
विवेक वाञ्छनीय छन् नयाँ बिहान आँकुरा
छ भोक, रोग, शोकको जरो सबै उखालिने
छ द्वेष, क्लेश, मूर्खता सबै सबै पखालिने ।
३.
असत्य माथि सत्यको छ जीत स्वच्छ निश्चित
विवाद नासिने कुरा बनी सक्यो सुनिश्चित
इमान प्वाँख फैलने, विमान कालको चढी
छ मेल येा उकासिने हिमाल टाकुरा चढी ।
४.
पुकारमा पवित्र जो निखार ल्याउने कला
विकास हुन्छ देशको, भविष्यमा अझै भला
निशङ्क छन् हुने सबै सपार्न विश्व एकता
छ एकमा अनेकता विचित्र भावना लता ।
५.
धरा हुनेछ उर्वरा, समस्त सौम्य सुन्दर
निकालिएर फालिने सबै कुरा असुन्दर
सुस्वप्न देखिने सधैं विकासको, निकासको
नयाँ बिहान आउने उदाउला निसाफको ।
६.
प्रसन्नता प्रचारमा प्रसार जीवनी बुटी
मिलेर पाहुना सबै रमाइलो बनोस् कुटी
निरोग बाँडिने भयो, विरोध भाँडिने भयो
अभाव, दम्भ, स्वार्थको जरा उखालिने भयो ।
७.
निषिद्ध काम रोकिने, विशिष्ट काम थालिने
सहर्ष जीवनी कला समर्थ छन् उचालिने
जरो सबै उखालियो अभावको, अनिष्टको
प्रभाव भाव पालियो स्वभावमा घनिष्टको ।
८.
सुनेर वाचना कला म मस्त दङ्ग पारिएँ
हट्यो उदासको पला खुला बनें उघारिएँ
म सङ्ग टाढिए सबै विकार, दुष्ट भावना
म आउँदा तिमी थियौ मुसुक्क मग्न कामना ।
९.
हटेर वैर टाढिए, सचेतना समालिए
जरा जरा भिजे सबै, कुरा किसानका खिले
दया मयाँ छ भन्दछन्, सुरम्य मन्द छन्द छन्
प्रवेश स्वस्थ शान्त छन् प्रयासमा प्रबन्ध झन् ।
१०.
नराख भाव खिन्नता, सपार लौ अभिन्नता
छ काल साथ मित्रता, कि वा दरित्रता सदा
म को विकासमा बढे हुनेछ साम्य एकता
विभिन्न रूप खिल्दछन् खिली रहून् अनेकता ।
११.
म हार्न चाहना कसै नराख्न बन्छु भिक्षुक
सदैव प्रेम झाङ्गियोस् भनेर भन्न इच्छुक
म सङ्ग प्रश्न छन् खुबै जवाफ यी सवालको
मुना मुसुक्क मस्किइन् इमानमा कमालको ।
१२.
विचारमा विशुद्धता प्रबुद्धता अपारको
छु पाउँदा रमाउँदै विशेष भाव प्यारको
चपक्क बाँधिने भएँ पियार रन्ध्र जो थियो
उदारता पवित्रमा धपक्क बल्छ त्यो दियो ।
१३.
पढेर एक अक्षरी अनेक अर्थ लाउनू
मिलेछ बाध्यता भने परै कतै धपाउनू
म सङ्ग मिल्न सक्छ को खुलस्त भन्न आउनू
मुसुक्क हासिने गरोस् विवादमा रमाउनू ।
१४.
लु हेर के भने भने म अर्थ बोधको कमी
बुझेर छक्क जो परें परेछ याम मौसमी
निपात वा विपात हो, सकिन्न बुझ्न के गरूँ
उडान बास पो सरूँ कि वा ढलीमली गरूँ ।
१५.
मिलेन भावना भने बसे भयो निरुत्तर
भनेर भन्दछौ सखा ! म सङ्ग छैन उत्तर
गरेर प्रश्न यो घरी खडा भयौ भयङ्कर
खुला छ तान्डवीयता कडा महेश, शङ्कर ।
१६.
म सङ्ग छन् कुनै भने अनर्थ चाखका कुरा
कहाँ सकिन्छ शैलको समुच्च चढ्न टाकुरा ?
भलाइबाट विश्वको म रङ्गिने तरङ्गिने
छ सोचमा उमङ्ग यो झनन्न झन्न झन्किने ।
१७.
प्रसङ्ग पेश यो गरूँ भने जसो यहाँ भयो
सगोल अर्थतन्त्रको विनाश फैलँदै गयो
छ राष्ट्र आज दन्दनी बली रहेर घाटमा
उकासिने कथा बनोस् सचेत वैद्य साथमा ।
१८.
म लेख्न सक्छु जो छिटो अनेकता निरन्तर
नमिल्छ टिप्पणी कुनै बने स्वयं निरुत्तर
समस्त वाचना कला निशासिए सबै किन
सकिन्न काव्यले कसै प्रभाव भावना दिन ।
१९.
विरक्त पार्न जिन्दगी सशक्त छन् सबै यहाँ
लछार्न वा पछार्नको सदैव बन्छ योजना
समस्त राष्ट्र रित्तियो, छ कोष शुन्य जो यहाँ
म खोज्छु मिल्छ त्यो कहाँ उकास्न राष्ट्र योजना ।
२०
मिलिजुली सकाउने छ राष्ट्र ध्यान एक जो
बुझेर भन्छु यो कुरा अभाव हो विवेकको
छ काम के सचेतको विचार होस् विवेचना
नकार शीघ्र चाहियाे उपाय होस् गवेषणा ।
२१.
न लेख्न, लेख्न के गरूँ छ को र गर्न वाचन
नमाग्न माग्न के गरूँ छ काम के र याचन
विलाप गर्न व्यर्थ हो, विषाद यो अनर्थको
छ पाइला उचालिने शनै शनै समर्थको ।
२२.
मुहार देख्न पाइयो भनेर लेख्न पाइयो
खुसी भएँ खुबै खुबै सचेतना समाइयो
छ धेनु आज गोठमा, सहास्य आज ओठमा
मुहार चट्ट रापिलो छ देखिँदै बनोटमा ।
२३.
छ प्रार्थना सधैँ भरी उदार भावकी परी !
उडी रहे भयो चरी बनी सफा बसुन्धरी
समस्त राग मेटियो, वसन्त वाग भेटियो
कुचक्र चाल रेटियो, सुगन्ध झन् समेटियो ।
२४.
नराख रीस किन्नरी, उदास पो हुने गरी
निकाल दम्भ दुर्दशा छ फाल्न दूर चा
छ भेट्न मात्र आतुरी छ थन्किने छिटै हुरी
बटोल्न स्वच्छता सबै निकाल मान्य माधुरी ।
२५.
हरेक एक शब्दमा छ व्यक्त भावना सफा
पुकार गर्छ प्रेमले मनोविनोदका कथा
सलज्ज देखिँदा परी, खुलस्त उड्न हो चरी
भनेर बुझ्न थालियो मजा उदाउने गरी ।
२६.
कुवा छ भ्यागुतो बसें म मख्ख टर्टराउँदै
चरी बनेर जो उड्यौ निमग्न छौ उदाउँदै
भनूँ भने नकच्चरी, मिलाप हुन्छ के गरी
छ पाइला उचालिँदै विनम्र भावना भरी ।
२७.
म सङ्ग छैन ज्ञानको कथा कुनै रमाइलो
र छैन, छैन, छैन है उपाय पो कमाइको
बिना विभाग च्यापियो, छ हाजिरी सधैं भर
सकिन्न काम त्यो गरी भेटिन्छ नाम दुच्छर ।
२८.
सुटुक्क आउँला कतै म साँझ वा बिहानमा
म पुग्न पर्छ पर्छ है अवश्य काल यानमा
सबेर या अबेरमा छ मर्न बुझ्छु यो कुरा
म पस्छु मोक्ष कुण्डमा वा चढ्छु शैल टाकुरा ।
२९.
गनेर अङ्क तालिका निमग्न धन्य बालिका
मुहारमा पवित्रता तरङ्ग देख्छु तालिका
भनूँ बनूँ म मालिका उदारता प्रसन्नता
दिलाउने छु भव्यता मसङ्ग खेल्न रम्यता ।
३०.
खुसुक्क हाँसियो परी भनेर स्वच्छ प्रेमिका
डराउने हराउने भएन चाल लेखिका
चिनेर बोल्न थालियो उपाय पाइयो सफा
सदावहार जिन्दगी बनाउने छ यो कथा ।
३१.
हजुर सामु आउने विचार राख्न पाउने
अवश्य आउला घडी मुसुक्क छौ उदाउने
म काखमा निदाउने गरेर चिम्म नेत्रमा
विनोद खुल्न आउँछन् बहार हुन्छ केन्द्रमा ।
३२.
सिकाउने टिकाउने सुवास मन्त्रणा गरी
प्रदीप बालियो सफा दवाव छैन याे घरी
अहा ! तिमी उदाउँछ्यौ बनेर कोपिला परी
खुलेर पुष्प वाटिका हुनेछ मुक्त यो घरी ।
३३.
तिमी सुनाउँदै गयौ छ वाचना सुवासमा
उपासना पवित्रता म डाक्छु श्वास श्वासमा
भनेर भन्दछौ पर ।                                                                                           अविचल आस्था मणि
                                         तनहुँ,नेपाल ।