Tsb

Ssb

Usb

Hl1

Gsb

Nps

Rgu

ptl

काठमाडौं । कोभिड-१९ का संक्रमित बढ्न थालेपछि उत्तरी चीनको एक शहरमा बिहीबारदेखि लकडाउन गरिएको छ । लकडाउनपछि विशेष परिस्थितिमा बाहेक मानिसहरू शहरबाट अन्य जान नपाउने भएका छन् ।

डेल्टा भेरियन्टका कारण संक्रमण बढेपछि सियान शहरका अधिकारीहरू लकडाउन गर्न बाध्य भएका हुन् । अधिकारीहरूले सियान शहरका ३० लाखभन्दा बढी मानिसलाई घरभित्रै बस्न भनेको अन्तर्राष्ट्रिय समाचार माध्यमले जनाएका छन् ।

बिहीबारदेखि हरेक परिवारका एक जना सदस्य २ दिन बिराएर अत्यावश्यक सामान किन्न बाहिर जान पाउने छन् । परिवारका अन्य सदस्य अत्यावश्यक काम बाहेक घर बाहिर निस्कन पाउने छैनन् ।

त्यस्तै, सियान विमानस्थलबाट हुने कैयौं उडान रद्द गरिएको छ भने अत्यावश्यक बाहेकका व्यावसाय बन्द भएका छन् । कर्मचारीलाई समेत घरबाटै काम गर्न भनिएको छ । सियानमा हाल डेल्टा भेरियन्टको प्रकोप बढेको अधिकारीहरूको भनाइ छ । तर उक्त शहरमा हालसम्म नयाँ ओमिक्रोन भेरियन्टका संक्रमित फेला परेका छैनन् ।

बुधबार चीनभर ७१ जना नयाँ संक्रमित थपिएको त्यहाँको राष्ट्रिय स्वास्थ्य आयोगले जनाएको छ । संक्रमितमध्ये ६३ जना सियान शहरका छन् । तर कुनै संक्रमितको मृत्यु नभएको आयोगले जारी गरेको सूचनामा उल्लेख छ ।

यस्तै चीनमा हालसम्म कुल १ लाख ६४४ जनामा कोरोना भाइरस पुष्टि भएको छ भने मृत्यु हुने संक्रमितको संख्या ४ हजार ६३६ रहेको छ ।अनलाइनखबर