रुकुमपूर्व । जँगली च्याउ खाँदा सात जना बिरामी परेका छन् । रुकुमपूर्वको पुथा उत्तरगंगा गाउँपालिका वडा नम्बर २ को विकट तथा दुर्गम गाउँ रलमा शनिबार बिहान बिरामी भएका उनिहरुलाई हेलिकप्टरबाट उद्धार गर्ने प्रयास सफल नभएपछि पाँच घण्टा पैदल हिँडेर गएका स्वास्थ्यकर्मीले ज्यान जोगाएका हुन् ।

स्थानीय ६० वर्षीय धर्मटेक पुन, ३२ वर्षीय लोकेन्द्र पुन, ३४ वर्षीय रचन पुन, ४३ वर्षीय खडक पुन, ३७ वर्षीया रथना पुन, ४१ वर्षीय दन्त रोका र ४९ वर्षीय बरण रोका बिरामी भएका थिए । रुकुमपूर्वका प्रमुख जिल्ला अधिकारी कोपिला राईका अनुसार शनिबार बिहान जङगलबाट ल्याएको च्याउ खाँनासँगै खाएपछि उनिहरु बिरामी परेको खबर आएको हो ।

त्यस्तै,उनिहरुमा बान्ता हुने, टाउको दुख्ने,पखाला लाग्ने,बेहोस् हुनेजस्ता समस्या देखिएको थियो । दुर्गम र विकट गाउँमा घटना घटेको र स्वास्थ्य अवस्था चिन्ताजनक रहेको भनेर स्थानीयले खबर गरेपछि उद्धारको लागि हेलिकप्टर ल्याउने सबै प्रक्रिया पूरा गरिएको थियो । खराब मौसमको कारण हेलिकप्टर जाने अवस्था नै नभएको प्रमुख जिल्ला अधिकारी कोलिपा राईले जानकारी दिए ।

शनिबार दिनभर हेलिकप्टर पठाउने तयारी गरिएको तर सफल हुन नसकेको उनले बताए । उनका अनुसार मैकोटबाट घण्टौ हिँडेर गएका स्वास्थ्यकर्मीहरुले बिरामीको ज्यान जोगाएका हुन् ।
शनिबार दिनभर,राति अबेला र आइतबार बिहान पनि बिरामीका आफन्तजन,प्रमुख जिल्ला अधिकारी,जिल्लाको सुरक्षा निकायको टोली, जिल्ला अस्पताल र गाउँपालिकाको टोलीले समन्वयमा गरिरहेको छ । बिरामीका आफन्तले स्वास्थ्य अवस्था सुधार भएकाले अब हेलिकप्टर आवश्यक नपर्ने भनेर खबर गरेको प्रजिअ राईले बताए ।

पुथा उत्तरगंगा गाउँपालिकाका स्वास्थ्य शाखाका सहसंयोजक कलिभान बिष्टका अनुसार अहिले उनिहरुको स्वास्थ्य अवस्था सामान्य बन्दै गइरहेको छ । वडा नम्वर १ को मैकोटमा रहेको स्वास्थ्य चौकीबाट तीन जना स्वास्थ्यकर्मीहरु करिब पाँच घण्टा पैदल हिडेर बिरामीहरुको उपचारका लागि रल गाउँ पुगेको बिष्टले जानकारी दिए ।

प्यारामेडिक्स दिपेन्द्र शाही र सन्तोष कापर र नर्सिङ निर्मला पुन गएराति ११ बजे बिरामीको घरमा पुगेर उपचार गरेपछि बिरामीहरुको अवस्था सामान्य बन्दै गएको छ । बिरामीहरु हिड्न सक्ने भएपछि थप जाँचको लागि मैकोटस्थित स्वास्थ्य चौकीमा ल्याउने सल्लाह भइरहेको सहसंयोजक बिष्टले बताए ।