काठमाडौं । नेपाली काङ्ग्रेसका सांसद अर्जुन नरसिंह केसीले संसदमा प्रतिपक्षको भूमिका अत्यन्त महत्वपूर्ण हुने बताएका छन् ।

सोमबार प्रतिनिधिसभा बैठकमा बोल्दै सांसद केसीले प्रतिपक्षीको आवाजलाई नियन्त्रण गर्न खोजिए त्यसले ठूलो समस्या निम्त्याउने चेतावनी दिए । उनले भने,’संसदको भिमकाय स्वरुप जति ठूलो भएपनि प्रतिपक्षको आवाज प्रतिपक्षको आवाज नै हो । त्यसलाई नियन्त्रण गर्न खोजियो भने आगोको झिल्को जति सानो भएपनि त्यो आगोको झिल्को नै हुन्छ ।’

त्यस्तै नेता केसीले संवाद र सहमतिमार्फत विश्वव्यापी रुपमा स्थापित लोकतान्त्रिक मूल्य मान्यता तथा संसदीय परम्परालाई मजबुत बनाउनुपर्नेमा जोड दिए । उनले पुराना गलत मानकहरूलाई परिवर्तन गरी नयाँ मानकहरु स्थापित गर्नुपर्नेमा जोड दिए ।

यस्तै सांसद केसीले संसद पूर्णरुपमा उत्पादक र परिणामुखी तथा जनताको उर्लिएको आकांक्षलाई सम्बोधन गर्न सफल हुनेमा विश्वास समेत व्यक्त गरे ।