Tsb

Hl1

Ssb

Usb

Gsb

Rgu

ptl

Nps

दाङ । देउखुरीको गढवा गाउँपालिकाको समन्वयमा विद्यालयस्तरमै कुष्ठरोग पहिचानका लागि बिहीबारदेखि स्क्रिनिङ कार्यक्रम सुरु गरिएको छ।

नेपाल महिला सामुदायिक सेवा केन्द्र,फेयर मेड फाउन्डेशन नेपाल र प्रेरणा परियोजनाको आर्थिक तथा प्राविधिक सहयोगमा सुरु गरिएको उक्त कार्यक्रमअन्तर्गत आज (बिहीबार) गढवा गाउँपालिका–३ स्थित सरस्वती माध्यमिक विद्यालय, बिद्यानगर गोबरडिहामा विद्यार्थीहरूको स्वास्थ्य परीक्षण गरिएको हो।

कार्यक्रममा १ सय ११ जना छात्रा र ८१ जना छात्रा गरी कुल १ सय ९२ जना विद्यार्थीको कुष्ठरोग स्क्रिनिङ गरिएको गढवा गाउँपालिका स्वास्थ्य शाखाले जानकारी दिएको छ ।

गाउँपालिकाले विद्यालय केन्द्रित अभियानमार्फत बालबालिकामाझ कुष्ठरोगबारे सचेतना अभिवृद्धि र समयमै रोगको पहिचान गर्ने उद्देश्य लिएको जनाएको छ । यसअघि जनता माध्यमिक विद्यालय, गढवा मा पनि सोही उद्देश्यका साथ कुष्ठरोगी खोज–पडतल कार्यक्रम सम्पन्न भइसकेको स्वास्थ्य शाखाले जनाएको छ ।

कार्यक्रमको अनुगमन गढवा गाउँपालिका स्वास्थ्य शाखाका प्रमुख कैलाश चन्द्र चौधरी र प्रेरणा परियोजनाका सामाजिक परिचालक अमित यादवले गरेका थिए । प्रमुख चौधरीका अनुसार गाउँपालिकामा कुष्ठरोगी देखिएका वडाहरूमा विशेष प्राथमिकताका साथ स्क्रिनिङ कार्यक्रम सञ्चालन भइरहेको छ ।

त्यस्तै उनका अनुसार विद्यालयस्तरका यस्ता अभियानहरुले रोग पहिचान,उपचारमा सहजता र समुदायमा कुष्ठरोगबारेका भ्रम हटाउन महत्त्वपूर्ण योगदान पुर्‍याउने विश्वास लिइएको छ ।