lms

काठमाडौं । अध्यागमन कार्यालयले नक्कली कागजात बनाएर विदेश जान खोज्ने व्यक्तिहरुलाई अफलोड (फिर्ता) गरेको छ ।

त्यस्तै पछिल्लो तीन महिनाको अवधिमा अफलोड गरिएकाहरुबाट २२६ राहदानी (पासपोर्ट) बरामद गरिएको छ । अफलोड गरिएकाहरुलाई भने नियन्त्रणमा नलिई उनीहरुका शंकास्पद कागजात मात्रै नियन्त्रणमा लिएर अनुसन्धान गर्ने गरिएको अध्यागन विभागले बताएको छ । पछिल्लो तीन महिनामा बरामद भएका २२६ पासपोर्टमध्ये १०६ पासपोर्ट छानबिन गरेर सम्बन्धित व्यक्तिलाई फिर्ता गरिएको छ ।

यस्तै बाँकी १२० पासपोर्ट भने अनुसन्धानका लागि भन्दै केन्द्रीय अनुसन्धान ब्यूरो (सीआईबी) र मानव बेचबिखन अनुसन्धान ब्यूरोमा पठाइएको विभागका महानिर्देशक रामचन्द्र तिवारीले बताए ।
यसअघि भिजिट भिसामा जाने नागरिकलाई ६ बुँदे प्राधवान कायम रहेकोमा त्यसैलाई आधार बनाउँदै अनियमितता हुने गरेको भन्दै अहिले भने त्यो प्रावधान खारेज गरिएको छ ।

त्यस्तै यसअघि भिजिट भिसामार्फत विदेश जानेका हकमा न्यूनतम ५ सय अमेरिकी डलर, दुईतर्फी हवाई टिकट,अग्रिम होटल बुकिङ वा स्पोन्सरको प्रमाण अनिवार्य गरिएको थियो ।
यसैलाई कारण देखाउँदै बिचौलियाहरुले रकम असुल्ने गरेको र भिजिट भिसामा जानेहरु थप पीडित हुने गरको भन्दै त्यो प्रावधान खारेज गरिएको विभागले बताएको छ ।