दाङ । देउखुरीको राप्ती गाउँपालिकाले पूर्व–पश्चिम राजमार्ग क्षेत्रमा रहेका जोखिमयुक्त रुखहरु हटाउन र दोलाई खोला किनारमा जम्मा भएको भष्कट व्यवस्थापन गर्न जिल्ला विपद व्यवस्थापन समितिमा सिफारिस गर्ने निर्णय गरेको छ।

गाउँपालिकाका अध्यक्ष एवं स्थानीय विपद व्यवस्थापन समितिका अध्यक्ष प्रकाश विष्टको अध्यक्षतामा बिहीबार बसेको बैठकले बर्खायाममा भष्कटले बाढी र कटानको जोखिम बढाएको र पुराना र ढल्न सक्ने रुख यात्रु तथा सवारीका लागि खतरा भएको उल्लेख गर्दै आवश्यक व्यवस्थापनका लागि समन्वय गर्न सिफारिस गर्ने निर्णय गरेको हो।

त्यस्तै बैठकमा विपद जोखिम न्यूनीकरण योजना कार्यान्वयन, राहत व्यवस्थापन प्रक्रिया अद्यावधिक, समुदायमा सचेतना अभिवृद्धि र सूचना प्रवाह सुदृढीकरणबारे पनि छलफल भएको थियो।

बैठकमा उपाध्यक्ष कमलापति चौधरी,प्रमुख प्रशासकीय अधिकृत देविराम पाठक,वडा अध्यक्षहरु,राजनीतिक दलका प्रतिनिधि,रेडक्रस, सुरक्षा निकायका अधिकारी र स्थानीय विपद व्यवस्थापन समितिका पदाधिकारीहरु लगायतको सहभागी रहेको थियो ।