Usb

Gsb

Tsb

Hl1

Ssb

ptl

Rgu

Nps

दाङ । नेपालको संविधान जारी भएको ११ वर्ष पूरा भएको अवसरमा लमहीमा नेकपा (माओवादी केन्द्र) ले दीप प्रज्वलन कार्यक्रम शुक्रबार लमहीमा सम्पन्न गरेको छ ।

लमही नगर कमिटीको आयोजनामा संविधान दिवसका दिन विशेष कार्यक्रम गरी संविधानप्रति सम्मान व्यक्त गर्दै पार्टीले लोकतन्त्र, समावेशीता र सामाजिक न्यायको आधारलाई थप मजबुत बनाउन सबैलाई आह्वान गरेको हो ।

नेकपा (माओवादी केन्द्र) लमही नगर अध्यक्ष दिल कुमार श्रेष्ठले संविधानले जनताको लामो बलिदान, आन्दोलन र संघर्षको परिणामस्वरूप जन्म लिएको उल्लेख गर्दै यसलाई कार्यान्वयन गर्ने जिम्मेवारी सबै राजनीतिक दल र नेतृत्वको रहेको बताए । उनले संविधान कार्यान्वयनमा आउने चुनौतीलाई सामूहिक एकताबाट समाधान गर्नुपर्नेमा जोड दिए ।

त्यस्तै कार्यक्रमका प्रमुख अतिथि नेकपा (माओवादी केन्द्र) का प्रदेश सदस्य तथा दाङ क्षेत्र नम्बर १ का इन्चार्ज अम्मर कँवर ‘नवीन’ले संविधानले मुलुकमा संघीय लोकतान्त्रिक गणतन्त्रको बाटो खोलिदिएको र जनताको अधिकारलाई संस्थागत गरेको बताए । अझै संविधानको मर्मअनुसार सबै वर्ग, जाति, लिंग र समुदायलाई समान हकअधिकार दिलाउन निरन्तर संघर्षरत रहनुपर्नेमा उनले जोड दिए । कँवरले अहिले देखिएको असन्तुष्टि, बेरोजगारी र राजनीतिक अस्थिरता समाधान गर्न संविधानको प्रभावकारी कार्यान्वयन नै प्रमुख उपाय भएको उल्लेख गरे ।

यस्तै कार्यक्रममा विशेष अतिथि वसन्त राज शर्मा ‘बिक्रान्त’ र ओम प्रसाद सुवेदी ‘सागर’ ले पनि आफ्ना विचार राखेका थिए । उनीहरूले संविधानले दिएको अधिकारलाई जोगाउन र जनताको जीवनस्तर सुधार गर्न माओवादी केन्द्र निरन्तर अग्रसर रहेको बताए । विशेषगरी किसान, मजदुर, विपन्न वर्ग र सीमान्तकृत समुदायका पक्षमा संविधानको कार्यान्वयन सुनिश्चित गर्नुपर्ने उनीहरूको धारणा थियो ।

दीप प्रज्वलन कार्यक्रममा सहभागीहरूले संविधान दिवसलाई औपचारिकता मात्र नभई अधिकार र कर्तव्यको प्रतिवद्धता व्यक्त गर्ने अवसरका रूपमा लिनुपर्ने बताएका थिए । संविधानले दिएको अधिकारलाई व्यवहारमा रूपान्तरण गर्न सबै तहका सरकार, दल र नागरिक समाज मिलेर अघि बढ्नुपर्नेमा जोड दिइएको थियो ।

त्यस्तै कार्यक्रममा पार्टीका नगर कमिटीका पदाधिकारी, वडा कमिटीका प्रतिनिधि, युवा र विद्यार्थी संगठनका अगुवा, महिला कार्यकर्ता तथा स्थानीय सर्वसाधारणको उल्लेख्य उपस्थिति रहेको थियो । उपस्थित सबैले संविधान दिवसमा दीप प्रज्वलन गरेर संविधानको सम्मान गर्ने मात्र नभई त्यसलाई संस्थागत गर्न सक्रिय भूमिका खेल्ने प्रतिज्ञा गरेका थिए । यसरी, संविधान दिवसका अवसरमा माओवादी केन्द्रले दीप प्रज्वलन कार्यक्रममार्फत मुलुकलाई स्थायी शान्ति, समृद्धि र समावेशी विकासतर्फ लैजान सबैलाई आह्वान गरेको छ ।