दाङ । विपत्तिमा परेका नागरिकप्रति मानवीय संवेदना प्रकट गर्दै ज्योति सामुदायिक वन उपभोक्ता समूहले रसुवाका बाढीपीडितका लागि प्रधानमन्त्री दैवी प्रकोप उद्धार कोषमा आर्थिक सहयोग जम्मा गरेको छ ।

गढवा गाउँपालिका वडा नम्बर ७ मा रहेको यस समूहले संस्थागत निर्णय गरी ११ हजार १ सय १५ रुपैयाँ सहयोग रकम कोषमा जम्मा गरेको हो । भौगोलिक दूरी जतिसुकै टाढा भएपनि संकटको बेला राज्यको आधिकारिक कोषमार्फत पीडितसम्म राहत पुगोस् भन्ने उद्देश्यले सो रकम जम्मा गरिएको समूहका अध्यक्ष हिरालाल चौधरीले जानकारी दिए ।

बाढीको चपेटामा परेका नागरिकप्रति गहिरो सहानुभूति प्रकट गर्दै अध्यक्ष चौधरीले भने, “रसुवाका आमाबुबा र दाजुभाइको पीडामा हाम्रो मन रोएको छ । हाम्रो यो सानो सहयोग रकम मात्र होइन, गढवाका वन उपभोक्ताहरुको तर्फबाट उहाँहरुको घाउमा थोरै भएपनि मल्हम लगाउने एउटा पवित्र प्रयास हो । संकटको यो घडीमा देशका नागरिकलाई ढाडस दिनु र राज्यको कोषलाई बलियो बनाउनु हामी सबैको दायित्व हो ।”