दाङ । देउखुरीको लमहीमा आइतवारदेखि एक महिने शिव महापुराण भक्तिज्ञान उत्सव आरम्भ भएको छ ।

जेष्ठ नागरिक सहायताकालागि परोपकार अक्षयकोष स्थापनार्थ सो कार्यक्रमको आयोजना गरिएको कार्यक्रममा बोल्दै अमृतशरण देवाचार्यले बताएका छन् ।

परोपकार अमृत नेपाल दाङको आयोजनामा संस्थाका अध्यक्ष अमृतशरण देवाचार्यको अध्यक्षतामा सुरु भएको कायक्रमको उद्घाटन गोरक्षरत्ननाथ पात्रदेव चौघेराका महन्त रतननाथ योगीले गरेका हुन् । कार्यक्रममा बोल्दै प्रमुख अतिथी योगीले आयोजक तथा प्रमुख कथावाचक अमृतशरण देवाचार्य सानै उमेरमा महत्वपुर्ण धार्मिक दख्खल प्राप्तगर्न सफल भएको प्रशंसा गर्दै यज्ञ उत्सव सफलताको कामना गरे ।

कार्यक्रममा लमही नगरपालिकाका प्रमुख जोगराज चौधरीले लमहीमा गर्न थालिएको एक महिने धार्मिक उतसवलाई सफलताको कामना गर्दै लक्ष्य र उद्देश्य पुरा हुनेगरि आयोजकलाई काम गर्न सुझाव दिए । धार्मिक कृयाकलापले मानव मस्तिष्क र आत्मा सुद्ध हुन्छ यो संगै जन्मदिने माता-पिताको सेवा गर्नुस यसमा पनि ठूलो धर्म हुन्छ चौधरीले भने । सो अवसरमा लमही नगरपालिकाका उपमेयर लक्ष्मी योगी,गोरक्ष रत्ननाथ चौघेराका डा भोलानाथ योगी लगायतले बोलेका थिए ।

एक महिनासम्म चल्ने मासिक भक्तिज्ञान उत्सवमा करोड दिप प्रज्वलन, हरेक दिन विहान ६ बजेदेखि ८ बजेसम्म संगितमय कथा प्रवचन, साझ ६ देखि साढे ६ सम्म स्तोत्र स्वस्वर पाठ र साढे ६ देखि साढे आठ सम्म श्रृंगारिक महाआरती,झाँकि लिला र भजन रहने तथा अन्य धार्मिक कृयाकलाप गर्न समेत अवसर रहेको आयोजकले जनाएको छ ।

कार्यक्रम सुरुहुनु अधि १५ वटा संघ-संस्था तथा टोलविकास सहितको कलश शोभायात्राले लमही बजार परिक्रमा गरेको थियो । पण्डित अमृतशरण देवाचार्यको स्वागत मन्तबय र विषय प्रवेश संगै सुरु भएको उद्घाटन कार्यक्रमको संचालन पत्रकार लिला शाहले गरेकि थिइन् ।