दाङ । देउखुरीको गढवा गाउँपालिकाले घरपालुवा तथा सामुदायिक कुकुरहरुको बन्ध्याकरण तथा एन्टी रेबिज विरुद्धको खोप अभियान सञ्चालन गर्ने भएको छ ।

गाउँपालिकाभर वैशाख २, ३ र ४ गते अभियान तीव्र गतिमा सञ्चालन गरिने तयारी गरिएको छ । गाउँपालिका पशुपंक्षी तथा मत्स्य विकास शाखाका अधिकृत खेम बहादुर चौधरीका अनुसार कुकुरको संख्या व्यवस्थापन तथा रेबिजजस्तो घातक रोग नियन्त्रणका लागि अभियान सञ्चालन गर्न लागिएको हो । “घरपालुवा र सामुदायिक कुकुर दुवैलाई लक्षित गरेर बन्ध्याकरण र एन्टी–रेबिज खोप अभियान सञ्चालन गर्न लागिएको हो, यसले दीर्घकालीन रुपमा स्वास्थ्य तथा वातावरणीय सुधारमा सहयोग पुर्‍याउनेछ,” उनले भने ।

यसैबीच,‘वातावरण तथा सामाजिक रूपान्तरणका लागि युवा रुपन्देही ’ संस्थाले गढवा गाउँपालिकासँग कुकुरहरुको बन्ध्याकरण तथा खोप कार्यक्रम सञ्चालन गर्ने सम्बन्धमा सम्झौता गरेको छ । उक्त सहकार्यबाट अभियानलाई प्रभावकारी रुपमा अगाडि बढाउने अपेक्षा गरिएको गाउँपालिकाले जनाएको छ ।

गाउँपालिका अध्यक्ष यमनारायण शर्मा पोख्रेलले अभियानलाई जनस्वास्थ्य र वातावरणीय सन्तुलनसँग जोडिएको महत्वपूर्ण कार्यक्रमका रुपमा लिँदै सबै नागरिकलाई सहयोग गर्न आग्रह गरेका छन् । “कुकुर व्यवस्थापन र रेबिज नियन्त्रण आजको आवश्यकता हो । यस अभियानले समुदायलाई सुरक्षित बनाउने मात्र होइन, मानवीय तरिकाले जनावर व्यवस्थापन गर्ने सन्देश पनि दिन्छ,” अध्यक्ष पोख्रेलले भने ।

अध्यक्ष पोख्रेलले अभियान सफल बनाउन स्थानीय बासिन्दा, टोल विकास संस्था तथा सरोकारवालाहरुको सक्रिय सहभागिता अपरिहार्य रहेको समेत उल्लेख गरे ।