दाङ । देउखुरीको राजपुरमा नेपाल टेलिकम (एनटिसी) को टावरलाई जोगाउन सशस्त्र प्रहरी र स्थानीयले अग्नि रेखा निर्माण गरेका छन् ।

वन डढेलोको समय भएको हुँदा राजपुर -७ गरुल भिर डाँडामा रहेको उक्त टावरलाई आगलागीबाट जोगाउन सुनपथरी नाकामा रहेको सशस्त्र प्रहरी बल बि.ओ.पि. र स्थानीय बासीले संयुक्त रुपमा आज अग्नि रेखा निर्माण गरेका हुन् ।

सुनपथरी नाकामा रहेको युगबोध आधारभूत विद्यालय व्यवस्थापन समितिका निवर्तमान अध्यक्ष गोरेन्द्र घर्ती मगरका अनुसार टावर भएको उक्त क्षेत्रमा आगलागीको उच्च जोखिम रहेको हुँदा सशस्त्र प्रहरी र स्थानीयले टावरलाई बचाउनका लागि अग्नि रेखा निर्माण गरिएको हो ।

अहिले नाका बासीले उक्त टावरको माध्यमबाट टेलीफोन र इन्टरनेट चालाउदै आएका छन् । यद्यपि अहिलेसम्म टावर बनेदेखि टावरको पहुँच रहेको उक्त स्थानमा मात्र सो सेवाहरु उपलब्ध हुँदै आएको छ । स्थानीयका अनुसार सरकारले मिनी टावरको व्यवस्थापन गरिदीएको खण्डमा नाकाका जनतालाई ठुलो राहत मिल्ने छ ।