Hl1

Gsb

Tsb

Ssb

Usb

Nps

Rgu

ptl

दाङ । बहुविवाहलाई कानुनी मान्यता दिने तयारीप्रति गम्भीर आपत्ति जनाउँदै अखिल नेपाल महिला संघ, जिल्ला कमिटी दाङले कानून,न्याय तथा संसदीय मामिला मन्त्रीसमक्ष ज्ञापनपत्र बुझाएको छ ।

उक्त ज्ञापनपत्र प्रमुख जिल्ला अधिकारी मार्फत मंगलबार मन्त्रीलाई बुझाइएको हो । संघकी अध्यक्ष लक्ष्मी शर्माको हस्ताक्षर रहेको ज्ञापनपत्रमा बहुविवाहलाई कानुनी रुपमा वैधता दिन खोजिएको हालको प्रस्तावले महिला अधिकार, लैङ्गिक समानता र सामाजिक न्यायविरुद्ध गम्भीर खतरा उत्पन्न गर्ने उल्लेख गरिएको छ ।

यस्तै ज्ञापनपत्रमा भनिएको छ,’नेपाली महिलाहरूले पितृसत्तात्मक सोच,हिंसा र विभेदविरुद्ध दशकौँदेखि संघर्ष गर्दै अधिकार हासिल गरेका छन् । तर, पछिल्लो समय महिलाको सहभागिता घटाउने, विवाहको उमेर घटाउने र बहुविवाहलाई पुनःकानुनी जालझेलमार्फत वैधता दिने प्रयास हुँदै आएको छ।’

त्यस्तै २०७५ साल भदौ १ गतेदेखि लागू भएको कानुनअनुसार पूर्ण रूपमा निषेध गरिएको बहुविवाहलाई फेरि संशोधनमार्फत पुनः वैध बनाउने तयारीले पितृसत्तात्मक संरचनालाई कानुनी संरक्षण दिने खतरनाक संकेत देखिएको संघको दाबी छ । संघले कानून,न्याय तथा संसदीय मामिला मन्त्रालयलाई बहुविवाहसम्बन्धी कानुनी संशोधनको प्रयास तत्काल फिर्ता लिन माग गर्दै, महिला समानताको मर्म र संवैधानिक अधिकारको रक्षा गर्न आग्रह गरेको छ ।

साथै,संघले महिला अधिकारमाथि प्रहार गर्ने कुनै पनि पश्चगामी कानुनी प्रयासविरुद्ध एकजुट भई आवाज उठाउन अधिकारकर्मी,नागरिक समाज र सबै प्रगतिशील शक्तिहरुलाई आह्वान समेत गरेको छ ।देशसञ्चार