म्याग्दी । रघुगङ्गा गाउँपालिकामा एक महिने मगर (खाम) भाषा प्रशिक्षण कार्यक्रम सुरु भएको छ । यो कार्यक्रम रघुगङ्गा गाउँपालिकाको आर्थिक सहयोगमा र पुन मगर समाजको आयोजनामा सञ्चालन हुन लागेकाे हो ।

प्रशिक्षण कार्यक्रम वडा नम्बर १ र ५ मा जेठ १८ गतेदेखि सुरु भइसकेको छ । वडा नम्बर १ को तिप्लाङस्थित कालिका माविमा शिक्षक र विद्यार्थीहरूलाई इर्धाशी( इराधा) झाक्री मगरले प्रशिक्षण दिइरहेका छन् । त्यस्तै,अन्तर्गतको बादुङ गाउँमा अमृत बुढा मगर,बेगको विभिन्न विद्यालयमा राकेश बुढा मगर र वडा नम्बर ५ को झिमा धनप्रसाद घर्ती मगरले प्रशिक्षण प्रदान गरिरहेका छन् ।

चार स्थानमा सञ्चालन भइरहेको यस प्रशिक्षणमा शिक्षक, विद्यार्थी र जनप्रतिनिधिहरु सहभागी छन् । चारै स्थान गरि १८५ जना प्रशिक्षार्थीहरुले प्रशिक्षण लिइरहेका छन् ।

रघुगङ्गामा सुरु हुनुअघि मालिका गाउँपालिकामा पनि १५ दिने मगर भाषा प्रशिक्षण सम्पन्न भइसकेको थियो,जसमा विज्ञ प्रशिक्षक कर्णबहादुर बुढा मगरको अगुवाइमा कार्यक्रम सञ्चालन गरिएको थियो । त्यसपछि,मागअनुसार रघुगङ्गामा एक महिनाको मगर खाम भाषा प्रशिक्षण सुरु गरिएको हो।

प्रशिक्षणमा सहभागी मगर समुदायले हराउँदै गएको आफ्नै मातृभाषा पुनः सिक्न पाउँदा खुशी व्यक्त गरेका छन् । उनीहरुको भनाइमा— “हामी हरायौं,तर अबको नयाँ पुस्ताका लागि हामीले केही अभिलेख राख्नैपर्छ भन्ने भनाई राखेका छन् ।