दाङ । संघीय सांसद मेटमणी चौधरीले आफ्नो निर्वाचन क्षेत्रको घरहरुमा लगाइएका टिनका छानाको अवस्था बारेमा मंगलबार स्थलगत पुगेर अनुगमन गरेका छन् ।

पुर्व शहरी विकास मन्त्री समेत रहेका सांसद चौधरीले आफ्नो निर्वाचन क्षेत्र भित्र पर्ने घोराही उपमहानगरपालिकाको वडा नम्बर १, २, ३, ४ र ५ को वडामा लगाइएको कुल ७ सय २५ घरहरुको अवस्था बारेमा स्थलगत पुगेर बुझेका हुन् ।

सरकारको सुरक्षित नागरिक आवास कार्यक्रम अन्तरगत टिनको छानो लगाएका नागरिकहरुसंग प्रत्येक्ष भेटघाट गरेर सम्पूर्णले टिन लगाएकि लगाएनन् ,टिन लगाउदा पाइने पहिलो किस्ता र दोस्रो किस्ता पाएकि पाएनन् भनेर सोधपुछ र अबस्था बारेमा बुझ्न आफू स्थलगत पुगेको सांसद चौधरीले बताए । स्थलगत पुगेर त्यहाँको बारेमा बुझ्दा,टिन लगाएका नागरिकहरुले आफुलाई भगवानको रुपमा मानेको बताए । तपाई हाम्रो लागी त भगवानकै रुपमा हुनुहुन्छ,भनेर त्यहाँका नागरिकले धेरै खुशी समेत व्यक्त गरेको सांसद चौधरीले बताए । उनले आफ्नो निर्वाचन क्षेत्रमा कुल ९ हजार घरधुरी रहेको र अहिलेसम्म ४५ सय घरधुरीमा टिन लगाइसकेको र अब बाकी ४५ सय घरधुरीमा दुई वर्ष भित्र कम्पलिट गर्ने बताए ।

त्यस्तै घरमा टिनको छानो लगाएका केहि नागरिकले समयमा रकम नपाउनुको कारण स्थानीय पालिकाहरुले समयमा भवन डिभिजन कार्यालयमा रिपोर्टहरु नपठाउदा यस्तो समस्या आएको बताए । पलिले सबै जिल्लाको रिपोर्ट आएपछि मात्र बजेट निकास गर्ने सिस्टम थियो भने अब जुन जिल्लाले पहिले रिपोर्ट पठाउछ,उक्त जिल्लाको पहिले काम गर्ने सिस्टम आएको हुँदा अब समस्या नहुने सांसद चौधरीले सिधा-पत्र डटकमलाई बताए ।

सांसद चौधरी २०७४ सालको निर्वाचनमा खरको छानो हटाएर सबैको घरमा टिनको छाना लगाइ दिने प्रमुख एजेन्डा बनाएर दाङ क्षेत्र नम्बर १ बाट उम्मेदवार बनेर चुनावमा हुम्मिएका थिए । उक्त एजेन्डा बोकेर प्रचारप्रसारमा हिड्ने समय धेरैले असम्भव एजेन्डा भनेर पट्याएका थिएनन् । तर उनले चुनाव जितेर उक्त एजेन्डालाई राष्ट्रिय एजेन्डा बनाएर अहिले आफ्नो निर्वाचन क्षेत्रमा टिनको छानो लगाउने अभियानलाई निरन्तर दिएका छन् ।