दाङ । जुवाको खालबाट सात जना जुवाडे बिहीबार पक्राउ परेका छन् । जिल्ला प्रहरी कार्यालय दाङकाअनुसार पक्राउ पर्नेमा रुकुम पूर्वको भूमे गाउँपालिका वडा नम्बर –३ घर भई घोराही उपमहानगरपालिका–१४ मा होटल सञ्चालन गरी बस्ने ४० वर्षीय बोधधन रोका, रुकुम पूर्व पुथा उत्तरगङ्गा–११ घर भई घोराही–१५ बस्ने ४१ वर्षका रामचन्द्र बुढा, ५६ वर्षका विष्णु बुढा, ५७ वर्षका ज्योती बुढा रहेका छन् ।

त्यस्तै घोराही–१५ का ४३ वर्षीय अम्मर घर्ती, पुथा उत्तरगङ्गा–११ घर भई घोराही–१४ बस्ने ५६ वर्षीय सुकलाल बुढा र घोराही–१३ बस्ने ४१ वर्षीय दीपक विक पनि पक्राउ परेका जिल्ला प्रहरी कार्यालय दाङका प्रहरी नायब उपरीक्षक ईश्वर थापाले जानकारी दिए ।

यस्तै उनीहरूको साथबाट ५८ हजार चार सय ५५ रुपैयाँ र तीन बुक तास बरामद गरिएको प्रहरीले जनाएको छ । घोराही–१४ मा रहेको कुमारी होटलमा जुवा खेलिरहेको अवस्थामा प्रहरीले उनीहरूलाई पक्राउ गरेको प्रहरीले जनाएको छ ।