कपिलवस्तु । वन्यजन्तु मारेर बिक्री गर्ने एक समूहलाई प्रहरीले पक्राउ गरेको छ । बाणगङ्गा नगरपालिका वडा नम्बर १ बाट वन्यजन्तु मार्न प्रयोग हुने बन्दुक,गोली र भाग लगाउँदै गरेको ३० किलो मासुसहित ४ जनालाई पक्राउ गरेको ईलाका प्रहरी कार्यालय पिपराले जनाएको छ ।
त्यस्तै प्रहरी निरीक्षक गोपाल रायमाझीको कमान्डमा खटिएको प्रहरी टोलीले सोही नगरपालिकाको वडा नम्बर १ जितपुर बस्ने धनबहादुर सेन,१ बुङ्ची बस्ने असीम खाँण, वडा नम्बर २ बस्ने दुर्गाबहादुर शाही र रुपन्देही जिल्ला बुटवल उपमहानगरपालिका वडा नम्बर ११ मिलन चोक चित्र मल्ललाई पक्राउ गरेको हो ।
उनीहरुलाई खाँणको घरमा मासु भाग लगाउँदै गरेको अवस्था पक्राउ गरिएको थियो । प्रहरीले बा १३ च ८१८४ नम्बरको कार, लु ५१ प ५२६१ नम्बरको मोटरसाइकल र १६ राउन्ड टोटासमेत बरामद गरेको छ । धन बहादुर सेनको घर खानतलासी गर्दा बाह्र बोर एकनाले बन्दुक २ थान,बाह्र बोर दुई नाले बन्दुक १ थान,दुवै बन्दुकमा लाग्ने टोटा २० थान, २२ हर्नेट लेखेको गोली ३ थान,म्याग्नममा लाग्ने गोली थान ३ बरामद गरेको हो । यस्तै उनीहरुलाई पक्राउ गरी डिभिजन वन कार्यालयलाई बुझाइ थप अनुसन्धान भैरहेको प्रहरीले जनाएको छ ।