दाङ । दाङको तुलसीपुर उपमहानगरपालिका वडा नम्बर ६, शिखरकोलनी निवासी आशिष गौतमको मोटरसाइकल चोरी भएको छ ।
बिहीबार आज बिहान करिब ११ बजेतिर आइडल बोर्डिङ स्कूलको प्रांगण बाहिर पार्किङ गरिराखेको रा ७ प २३९६ नम्बरको कालो र रातो रंगको १५० सिसीको मोटरसाइकल हराएको आशिष गौतमले जानकारी दिए । गौतम सोही विद्यालयका शिक्षक हुन् । बाहिर मोटरसाइकल पार्किङ गरेर परीक्षा हलमा प्रवेश गरेपछि करिब ११–२ बजेको बिचमा मोटरसाइकल चोरी भएको हुन सक्ने उनले बताए ।
त्यस्तै परीक्षा हलबाट बाहिर निस्केपछि मात्रै मोटरसाइकल प्रांगणमा नभएको थाहा भएको उनले बताए । साथै उनले मोटरसाइकल हराएको उजुरी प्रहरीमा दिइसकेको पनि बताए । तर मोटरसाइकल हराएको उजुरी आइनसकेको इलाका प्रहरी कार्यालय तुलसीपुरका सूचना अधिकारी नवचन्द्र मल्लले जानकारी दिए । यस्तै मोटरसाइकल फेला पार्नु हुनेले नजिकैको प्रहरी कार्यालयमा सम्पर्क गर्न गौतमले अनुरोध गरेका छन् ।
यसैबिच पछिल्लो समय पश्चिम दाङमा मोटरसाइकल चोरीका घटना दिनप्रति बढ्दो छ । तर प्रहरी प्रसाशन भने यस विषयमा बेखबर बन्ने गरेको छ । समयमै उजुरी दर्ता गरेपनि त्यसलाई गम्भीरतापूर्व नलिने गरेको पिडितहरुको गुनासो छ ।
त्यस्तै चोरी हुनुको मुख्य कारण सिसी क्यामराको जडान नगरेको भन्दै प्रहरी पन्छिने गरेको छ । विशेष गरेर पछिल्लो समय तुलसीपुर क्षेत्रमा सुरक्षा चुनौती बढ्दो रहेको जनाइएको छ ।