दाङ । आमाबुवा गुमाएर बेसाहारा बनेका घोराही १९ तिर्साङका ४ जना बालबालिकाको उद्धार गरिएको छ । सुर्खेतस्थित बाल ग्राम एसओएससँगको समन्वयमा आज ती बालबालिकालाई त्यहीँ बस्ने खाने र शिक्षादिक्षा निशुल्क रुपमा व्यवस्था हुने गरी पठाईएको हो ।

कोइलाखानीमा काम गर्दै गर्दा २०७७ फागुुन १० गते बुवा मोहनलाल कामीको निधनपछि आमाको सहारामा बस्दै आएका ती बालबालिकाहरु गत वर्षको मंसीरमा आमाको पनि निधन भएपछि बेसाहा बनेका थिए ।

२०७८ मंसीर २८ गते आमा शान्ति कामीको निधनपछि काकी चन्द्रकला कामीले स्याहार गर्दै आएकोमा पछि उनीहरुको परिवारमा श्रीमान श्रीमति बीच विवाद भएपछि बालबालिकाहरु थप समस्यामा परेका थिए । उनीहरुको समस्या देखेर स्थानीय अमृता घर्तीले चारै जनालाई आफुसँग राखेर पालनपोषण गर्दै आउनुभएको थियो ।

तर, दीर्घकालीन व्यवस्थापन गर्न समस्या भएपछि अन्ततः आज उनीहरुलाई एसओएस बाल ग्राम सुर्खेत पठाइएको नेपाल पत्रकार महासंघ दाङ शाखा अध्यक्ष दुर्गालाल केसीले जानकारी दिनुभयो ।

आमा शान्ति कामीको निधनपछि अनाथ बनेका बालबालिकाहरुको पालनपोषणका लागि विभिन्न व्यक्ति, संघसंस्थाले चासो लिएपनि दीगो नहुने देखेपछि सुर्खेत पठाइएको उहाँले बताउनुभयो ।

आज १४ वर्षीय दीपक कामी, उनकी बहिनी १२ वर्षीया सर्मिला विश्वकर्मा, भाई ७ वर्षीय अशोक कामी र डेढ वर्षकी सोनिया कामीलाई पछिल्लो समय रेखदेख गर्दै आउनुभएकी अमृता घर्ती, उहाँका श्रीमान र फुपाजुसँग सुर्खेत पठाइएको अध्यक्ष केसीले बताउनुभयो ।

अब उनीहरु २१ वर्षको उमेरसम्म त्यहीँ बसेर निशुल्क रुपमा शिक्षादिक्षा लिनेछन् । उनीहरुलाई सुर्खेतसम्म पुर्याउन पद्योदयमा २०५५ सालमा एसएलसी दिएका विद्यार्थीहरुको समुहले आर्थिक सहयोग गरेको छ । दुखमा सहयोग गर्नुपर्छ भनेर यातायातको व्यवस्था गरिदिएको सो समुहका अध्यक्ष जीवन अधिकारीले बताउनुभयो ।

बालबालिकाको दुख देखेर स्याहार सुसार गर्दै आउनुभएकी अमृताले आवश्यक कागजी प्रकृयामा पनिसघाउनु भएको थियो । उनीहरुको दुख देखेर उज्जवल भविष्यका लागि निस्वार्थ सहयोग गरेको उहाँले बताउनुभयो । एसओएस संस्थाले अभिभावकत्व लिएपछि उहाँलाई पनि खुशी लागेको छ ।

यस्तै,अनाथ बनेका दीपकले पनि आफुहरुको भविष्यको लागि पहल गरेर राम्रो ठाउँमा पुर्याएको भन्दै हर्षित भएको बताउनुभयो । बालबालिकाहरु अनाथ बनेपछि औपचारिक रुपमा स्थानीय सरकारले सार्थक पहल नगरेको पाइएको छ ।