रुकुम । रुकुम पूर्वको सिस्ने गाउँपालिका १ का नागरिकको बिजुली, टेलिफोन, स्वास्थ्य संस्था लगायत आधारभूत सेवा पाउनबाट पनि गाउँका नागरिक बञ्जित भइरहेका छन् ।

स्थानीय सरकारमा जनप्रतिनिधि आएपछि सबैभन्दा धेरै रकम सडक निर्माणमा खर्च भएपनि उनीहरूको बस्तीमा सडक पुगेको छैन । आधारभूत विकासको पखाईमा नागरिकहरू कष्टकर जीवन बिताइरहेका छन् । देशकै चर्चित हिमाल, सिस्ने हिमालको फेदिमा रहेको सिस्ने बस्तीमा सडकको पहुँच नपुग्दा एक पोका नुनको मुल्य ६० रुपैयाँ पर्ने स्थानीयवासी मनबहादुर बुढाले बताउनु भयो ।

त्यस्तै ४ सय घर परिवारको बसोबास रहेको गाउँमा सडक मात्रै नभइ विजुली बत्ति पुगेको छैन जसकारण मोबाइल फोन सहित सञ्चार सुविधा समेत उनीहरूको प्रयोगमा छैन । अन्य समयमा जसोतसो चलेपनि गाउँमा कोही बिरामी पर्दा अस्पताल पुग्नको लागि जिल्ला सदरमुकाम तथा गाउँपालिका केन्द्र रुकुमकोटमा दुई दिन पैदल हिडेर पुग्नु पर्ने बाध्यता रहेको स्थानीय जक्तबहादुर बुढाले बताउनु भयो ।

स्थानीय स्तरमा उत्पादन भएको अन्नवालीले वर्षभरी खान पुग्दैन, खाद्यान्नको अभाव झेल्न युवाहरू भारत सहित अन्य मूलुक जाने गरेका छन् । गाउँपालिकाका उपाध्यक्ष गोवद्र्धन बुढाले नेपाल टेलिकमले टावर बनाइरहेकाले केहीसमय पछि सञ्चारको सुविधा पुग्ने र ४५ किलोवाटको विद्यूत आयोजना निर्माणाधिन अवस्थामा रहेको बताउनुभयो । भौगोलिक र पर्यटकीय हिसाबले सुन्दर गाउँका नागरिक विकासको प्रतिक्षामा छन् ।