दाङ । नेपाली काङ्ग्रेस लमही नगरकार्यसमितिमा आबद्ध रहेका युवाहरुको एक समूहले भोटेकोशी क्षेत्रका बाढीपीडित नागरिकहरुको राहत तथा उद्धारका लागि आर्थिक सहयोग प्रदान गरेको छ ।

सिन्धुपाल्चोकको भोटेकोशी क्षेत्रमा आएको भीषण बाढीका कारण समस्यामा परेका नागरिकहरुलाई सहयोग पुर्‍याउने उद्देश्यले युवाहरुले स्वस्फूर्त रुपमा रकम संकलन गरेका हुन् । युवाहरुको समूहले संकलन गरेको कुल ५१ हजार ५ सय ५५ रुपैयाँ काङ्ग्रेस दाङ क्षेत्र नम्बर १ का सभापति भेषराज पाण्डेलाई एक कार्यक्रमका बीच हस्तान्तरण गरेको हो । उक्त सहयोग रकम नेपाली काङ्ग्रेस केन्द्रीय कार्यालयमा पठाइने र केन्द्रीय कार्यालय मार्फत प्रधानमन्त्री दैवीप्रकोप उद्धार तथा राहत कोषमा जम्मा गरिने जानकारी दिइएको छ ।

नेपाली काङ्ग्रेस लमही नगरपालिकाका नगर सभापति सन्तोष बुढाथोकीका अनुसार प्राकृतिक विपत्तिको यस कठिन समयमा पीडित नागरिकहरुलाई थोरै भएपनि मलम लगाउन सकियोस् भन्ने उद्देश्यले युवाहरुले यो अभियान चलाएका हुन् । प्राकृतिक विपत्तिबाट प्रभावित नागरिकहरुको उद्धार र पुनर्स्थापनाका लागि युवाहरुले चालेको यो कदम निकै प्रशंसनीय रहेको स्थानीय नेताहरुले बताएका छन् । संकलित रकमले बाढीपीडितहरुको राहत तथा उद्धार कार्यमा महत्त्वपूर्ण सहयोग पुग्ने अपेक्षा समेत गरिएको छ ।