दाङ । २२ वर्षीया महिलालाई बेचविखन गरेको कसुरमा दोषी ठहर गर्दै जिल्ला अदालत दाङले तुलसीपुर उमनपा–१६ का ३० वर्षीय राजेश नेपाली र उनकी पत्नी ३५ वर्षीया राधा पाण्डेलाई जनही ३० वर्ष कैद गर्ने फैसला गरेको छ ।

जिल्ला न्यायाधीश लालसिंह थापाको इजलासले बिहीबार कसुरमा दोषी ठहर गर्दै राजेशलाई ३० वर्ष छ महिना कैद तथा २ लाख ५ हजार जरिवाना, ५० हजार क्षतिपूर्ति दिनुपर्ने फैसला गरेको छ । यस्तै राधा पाण्डेलाई ३० वर्ष कैद २ लाख जरिवाना, ५० हजार क्षतिपूर्ति भराउनुपर्ने अदालतले फैसला गरेको छ ।

त्यस्तै,अदालतले महिला किन्ने भारत उत्तर प्रदेश बलरामपुर जिल्ला इमिलियाका ४९ वर्षीय राम निवास मौर्यलाई २७ वर्ष कैद, ३ लाख ५० हजार जरिवाना र १८ हजार क्षतिपूर्ति भराउने फैसला गरेको छ । राजेशलाई मानव बेचविखन कसुरमा २० वर्ष, महिलालाई यौनजन्य गतिविधिमा लगाएको कसुरमा १० र पटके कसुरमा थप छ महिना गरी ३० वर्ष छ महिना कैद गरिएको हो ।

यसैगरी,राधा पाण्डेलाई मानव बेचविखन कसुरमा २० वर्ष, महिलालाई यौनजन्य गतिविधिमा लगाएको कसुरमा १० वर्ष गरी ३० वर्ष र मौर्यलाई मानव बेचविखन कसुरमा २० वर्ष, जवरजस्तीकरणीको कसुरमा थप ७ वर्ष गरी २७ वर्ष कैद गर्ने फैसला गरिएको छ ।