रोल्पा । थबाङ गाउँपालिका वडा नम्बर ५, उवाको कोटलबारामा अविरल वर्षाका कारण गएको पहिरोले तीनवटा घर पुरिँदा दुई जनाको मृत्यु भएको छ भने केही व्यक्ति घाइते तथा बेपत्ता भएका छन् ।

स्थानीयका अनुसार बिहीबार साँझ करिब ७ बजेतिर नम्बाङ खोला हुँदै दाङसगातर्फ जाने बाटोबाट पल्लोपट्टिबाट आएको पहिरोको छालले एउटा घर पुरेको र त्यसपछि तल्लोपट्टिका थप दुई घरसमेत पुरिएका हुन् ।

पहिरोमा पुरिएका तीन घरमा जम्मा १३ जना रहेको बताइएको छ । उनीहरूमध्ये कमलबहादुर पुन मगर र शान्ति पुन मगरको शव फेला परेको स्थानीयले बताएका छन् । त्यस्तै हिमाल पुन गम्भीर घाइते भएका छन् भने सञ्जय पुनको एक खुट्टामा गम्भीर चोट लागेको बताइएको छ । बाँकी ६ जना पुरुष र ३ जना महिलाको अवस्था तथा पहिचान यकिन हुन सकेको छैन । उनीहरू पहिरोमा पुरिएर बेपत्ता भएको आशंका गरिएको छ ।

घटना साँझको समयमा भएकाले राति उद्धार कार्यमा कठिनाइ भएको स्थानीयले बताएका छन् । उवा प्रहरी र स्थानीय बासिन्दाहरू उद्धारमा खटिएपनि अँध्यारो तथा लगातार वर्षाका कारण उद्धार कार्य कठिन भइरहेको बताइएको छ । पहिरोमा पुरिएका घरमा रहेका पशुचौपायाको संख्यापनि यकिन हुन नसकेको स्थानीयको भनाइ छ ।

त्यस्तै,थप उद्धार तथा खोजीका लागि सुलिचौर इलाका प्रहरी कार्यालयबाट समेत टोली घटनास्थल तर्फ हिँडेको जानकारी प्राप्त भएको छ । घटनाको विस्तृत विवरण तथा बेपत्ता व्यक्तिहरूको अवस्थाबारे उद्धार कार्यपछि मात्र थप जानकारी आउने बताइएको छ ।