दाङ । देउखुरीको लमहीमा लागुऔषध ब्राउनसुगर सहित एकजना महिला पक्राउ परेकी छिन् ।

पक्राउ पर्नेमा घोराही उपमहानगरपलिका वडा नम्बर १४,हेलोटावर टोल बस्ने वर्ष २० कि अनिता बिक रहेकि छिन् । शनिबार आज बिहान अन्दाजी ३:२० बजेको समयमा लमही नगरपालिका वडा नम्बर ४ स्थित महेन्द्र राजमार्ग अन्तरगत सुन खोलीबाट बिक पक्राउ परेकी हुन् ।

बिकलाई खानतलासी गर्दा निजले बोकेको लेडिज हेण्ड ब्याग भित्र लुकाई राखेको लागुऔषध (ब्राउन सुगर) जस्तो देखिने खैरो रंगको धुलो पदार्थ २४० मिलिग्राम सहित पक्राउ गरिएको वडा प्रहरी कार्यालय लमहीका प्रहरी प्रमुख प्रहरी निरीक्षक रोशनराज पाण्डेयले जानकारी दिए ।

त्यस्तै उक्त स्थानमा लागूऔषध कारोबार हुन सक्ने भन्ने विशेष सूचनाको आधारमा वडा प्रहरी कार्यालय लमहीबाट खटेको प्रहरी टोलीले संकास्पद रुपमा उभिरहेकी बिकलाई पक्राउ गरिएको प्रहरी प्रमुख प्रहरी निरीक्षक पाण्डेयले जानकारी दिए । यस्तै बिकलाई अहिले नियन्त्रणमा ल्याई थप अनुसन्धान भइरहेको वडा प्रहरी कार्यालय लमहीले जनाएको छ ।