प्यूठान । प्यूठानमा भएको स्कारपियो दुर्घटनामा परि एक जनाको घटना स्थलमा मृत्यु भएको छ भने ३ जना गम्भीर घाइते भएका छन् । जिल्ला प्रहरी कार्यालय प्यूठानका अनुसार अर्घाखाँचीको शितगंगा नगरपालिका- ७ का अन्दाजी ४२ वर्षीय टंक बहादुर बुढाको घटनास्थलमै मृत्यु भएको हो ।
अचानक गाडीको ब्रेक फेल भएको कारण सो स्कारपियो दुर्घटना भएको प्रहरीले जनाएको छ । उक्त दुर्घटनामा अन्य ३ जना गम्भीर घाइते भएका छन् । उनीहरूको अहिले प्यूठान जिल्ला अस्पताल बिजुवारमा उपचार भइरहको छ । त्यस्तै गाडिमा जम्मा एघार जना यात्रु सवार थिए। गाडि सडकबाट ५० मिटर तल खसेको हो । दाङको भालुवाङबाट रोल्पाको सुलिचौरका लागि छुटेको रा १ ज ८०९ नम्वरको स्कारपियो शुक्रबार बिहान प्यूठानको सरुमारानी गाउँपालिका वडा नम्बर ६ मोतिपुरमा दुर्घटनामा परेको प्रहरी नायव उपरीक्षक (डीएसपी) सुनिल मल्लले बताउनु भयो ।