दाङ । दाङको बंगलाचुली गाउँपालिकाको अधिकांश ठाउँमा नेपाल टेलिकमको मोबाईलफोन सेवा अवरुद्ध भएको छ ।

सेवा अवरुद्ध हुँदा यहाँका सयौँ नागरिक संचार सेवा पाउनबाट बन्चित भएका छन् ।टेलिकमको टावरमा करिव एक हप्ता पहिलेदेखि समस्या आएको कारण टेलिफोन सेवा अनियमित भएको छ । बंगलाचुली गाउँपालिका वडा नम्वर ६ टोड्के लेकमा रहेको टावरले काम नगर्दा टेलीफोन सेवा अवरुद्ध भएको हो ।

यस क्षेत्रमा वर्षौदेखि वर्षातको समयमा यो समस्या झेल्नुपरेको स्थानीय शुसिल परियारले बताउनु भयो । उहाँका अनुसार नेपाल टेलिकमले गुणस्तरीय सेवा नदिँदा स्थानीयहरुलाई वर्षातको समयमा निकै समस्या हुने गरेको छ । उक्त ठाउँमा विद्युत अनियमित भईरहने र विद्युत जाँदासंगै मोबाईनमा नेटवर्क पनि जाने समस्या रहेको छ । साथै वर्षातको समयमा नेटवर्कको गति निकै कमजोर हुँदा समस्या आइरहेको स्थानीयहरुको भनाइ रहेको छ ।

त्यस्तै सो समस्या उत्पन्न भएपछि बंगलाचुलीको अधिकांश ठाउँका नागरिक मोबाईलफोन सेवाबाट बञ्चित भएका छन् । बंगलाचुलीमा मोबाईल टावरमा बारम्बार समस्या उत्पन्न हुँदा पनि नेपाल टेलिकम कार्यालय बेखबर छ । मोबाईल फोन सेवा अनियमित भएको हप्ता दिन बितिसक्दा पनि टेलिकम कार्यालयले कुनै चासो नदिएको स्थानीय शुसिल परियारको भनाई रहेको छ ।