Lnp1

Ggp3

Lnp2

Ggp6

Lnp9

Ggp2

Lnp3

Lnp5

Ggp1

Lnp-8

Ggp5

Ggp4

दाङ । नेपाल पत्रकार महासंघ दाङ शाखा र ग्लोबल नेप्लिज न्यूज नेटवर्क यूकेको आयोजनामा आइतबार ‘सडक दुर्घटना न्यूनिकरण: कसको जिम्मेवारी ?’ बिषयक अनलाइन अन्तक्र्रिया कार्यक्रम सम्पन्न भएको छ ।

कार्यक्रममा बिभिन्न विज्ञहरुले सडक दुर्घटना न्यूनिकरण सम्बन्धी प्रस्तुती राखेका थिए । भौतिक पूर्वाधार तथा यातायात मन्त्रालयका सहसचिव शिवहरी सापकोटा, काठमाण्डौ मेडिकल कलेजका कम्युनिटी मेडिसिनका विभागीय प्रमुख डा. सुनीलकुमार जोशी र यूनिभर्सिटी अफ द वेष्ट अफ ईङ्ल्याण्ड, यूकेका पूर्व रिसर्च फेलो डा. पुष्पराज पन्तले दुर्घटना न्यूनिकरणमा गर्नसकिने उपायबारे प्रकाश पारेका थिए ।

उनीहरुले सडक दुर्घटनाले भैरहेको क्षती, दुर्घटना कम गर्न भैरहेका प्रयास, अन्तर्राष्ट्रिय अभ्यास जस्ता बिषयमा स्पष्ट पारेका थिए । कार्यक्रममा लुम्विनी प्रदेश ट्राफिक प्रहरी कार्यालय प्रमुख एस्पी योगेन्द्रसिंह थापाले दुर्घटना न्यूनिकरणका लागि सवारीसाधन जाँच, कारवाही र सचेतनामुलक कार्यक्रमहरु सञ्चालन भैरहेको जानकारी दिएका थिए । कार्यक्रममा सहभागी जर्मनीबाट पत्रकार दिपक धिताल र दाङबाट पत्रकार रञ्जिता शर्माले सवारीचालक अनुमतिपत्र वितरणमा हुने लापरवाही र सडकको दुराबस्थाले दुर्घटना बढिरहेको धारणा व्यक्त गरेका थिए ।

त्रिभुवन विश्वविद्यालयकी उपप्राध्यापक एवं सडक दुर्घटना र चोटपटक सम्बन्धी अनुसन्धानकर्ता भगवती सेढाइले कार्यक्रमको निष्कर्ष प्रस्तुत गरेकी थिइन् । ट्राफिक प्रहरीको सक्रियता, सडकको अबस्था सुधार, सवारी चालक अनुमतिपत्र वितरणमा गम्भिरता जस्ता बिषयमा सरोकारवालाले ध्यान दिन जरुरी रहेको उनले बताइन् । पत्रकार महासंघका दाङ शाखा अध्यक्ष दुर्गालाल केसीको स्वागत मन्तव्यबाट शुरु भएको कार्यक्रममा महासंघका केन्द्रीय अध्यक्ष बिपुल पोख्रेलले सडक दुर्घटना न्यूनिकरणमा मिडियाले खेल्नसक्ने भूमिकाबारे प्रकाश पारेका थिए । ग्लोबल नेप्लिज न्यूज नेटवर्क यूकेका प्रधान सम्पादक जगन कार्कीले दुर्घटना न्यूनिकरणमा सबै सरोकारवालाको गम्भिरता जरुरी रहेको बताए । कार्यक्रमको सहजिकरण बिबिसीका पत्रकार भगिरथ योगीले गरेका थिए ।