दाङ । लमही-६,स्थित गोरखा मोडेल सेकेन्डरी स्कुलले शैक्षिक सत्र २०८२ का उपलब्धिहरु सोमबार आज सार्वजनिक गरेको छ । विद्यालयले पत्रकार भेटघाट तथा अन्तरक्रिया कार्यक्रम आयोजना गर्दै शैक्षिक तथा अतिरिक्त क्रियाकलापतर्फका उपलब्धिहरु सार्वजनिक गरेको हो ।

कार्यक्रममा विद्यालयका प्राचार्य लोकमान रिजालले विद्यालयले छोटो समयमै देउखुरी उपत्यकामा गुणस्तरीय शिक्षाको क्षेत्रमा महत्वपूर्ण स्थान बनाउन सफल भएको बताए । उनले विद्यालयको प्रगति र विस्तारमा सञ्चारकर्मीहरुको साथ, सहयोग र सकारात्मक भूमिकाप्रति कृतज्ञता व्यक्त गरे । प्राचार्य रिजालका अनुसार विद्यालयले कक्षा ८ मा लमही नगरस्तरमा छात्र र छात्रा दुवैतर्फ प्रथम स्थान हासिल गरेको छ ।

यसैगरी एस.इ.इ. परीक्षामा १ जना विद्यार्थीले ४ जीपीए र ३० जनाले ए प्लस प्राप्त गरेका छन् । कक्षा १२ विज्ञान र व्यवस्थापन दुवै विषयमा देउखुरी प्रथम स्थान हासिल भएको छ भने व्यवस्थापनतर्फ १३ जना विद्यार्थीले ए प्लस ल्याएका छन् । त्यस्तै, आईओई र आईओएम प्रवेश परीक्षामा ९ जनाले पूर्ण छात्रवृत्ति र २८ जनाले सशुल्क नाम निकाल्न सफल भएको विद्यालयले जनाएको छ ।

अतिरिक्त क्रियाकलापतर्फ पनि विद्यालयका विद्यार्थीहरुले उत्कृष्ट प्रदर्शन गरेका छन् । निबन्ध, कविता, चित्रकला तथा नृत्य प्रतियोगितामा नगर तथा जिल्ला स्तरमा प्रथम, द्वितीय र तृतीय स्थान हासिल गरेका छन् । खेलकुदतर्फ मिनी म्याराथन, रनिङ, लङ जम्प र ट्रिपल जम्प लगायतका प्रतियोगितामा पदक जित्नुका साथै सातौं राष्ट्रपति रनिङ शिल्डमा १९ स्वर्ण पदकसहित प्रथम स्थान हासिल गरेको विद्यालयले जानकारी दिएको छ ।
विद्यालयमा हाल २ हजार ३२८ विद्यार्थी अध्ययनरत रहेका छन् ।

त्यस्तै ७५ जना पूर्णकालीन तथा ९ जना आंशिक शिक्षक कार्यरत छन् भने ३४ जना कर्मचारी रहेका छन् । आगामी शैक्षिक सत्र २०८३ मा शिक्षण सिकाइलाई अझ प्रभावकारी र व्यवहारिक बनाउन विभिन्न कार्यक्रमहरुलाई निरन्तरता दिने विद्यालयले जनाएको छ । पूर्व–प्राथमिकदेखि माध्यमिक तहसम्म परियोजना कार्य, योग अभ्यास, लागुऔषध सचेतना, हस्तलेखन सुधार, नियमित स्वास्थ्य परीक्षण, मनोपरामर्श तथा शिक्षकहरुको व्यवसायिक विकास तालिम सञ्चालन गरिनेछ ।

विद्यालयले नयाँ शैक्षिक सत्रका लागि भर्ना अभियान पनि घोषणा गरेको छ । विद्यालयका अनुसार भर्ना फारम २०८३ बैशाख २ गतेदेखि खुल्नेछ । भर्ना प्रक्रिया बैशाख १५ गतेदेखि सुरु हुनेछ भने कक्षा सञ्चालन बैशाख २१ गतेदेखि हुने जनाइएको छ ।