काठमाडौँ । सार्वजनिक खरिद अनुगमन कार्यालयको प्रणालीमा अनाधिकृत पहुँच पुर्‍याई ठेक्काका विवरण हेरफेर गरेको आरोपमा ६ जनालाई पक्राउ परेका छन् ।

नेपाल प्रहरीको केन्द्रीय अनुसन्धान ब्यूरो (सीआईबी) र साइबर ब्युरोको संयुक्त टोलीले उनीहरुलाई काठमाडौँ उपत्यकाका विभिन्न ठाउँबाट पक्राउ गरेको हो । उनीहरुले ठेक्काहरुको आर्थिक प्रस्ताव खोल्नु भन्दा अगावै आर्थिक प्रस्तावको डकुमेन्ट परिवर्तन गरेको खुलेको प्रहरीले जनाएको छ ।

साइबर ब्युरो भोटाहिटीमा विद्युतीय कारोबार ऐन,२०६३ अन्तर्गतको कसुरमा उजुरी परेको थियो । प्रारम्भिक अनुसन्धानमा उनीहरुले ठेक्कापट्टाको आर्थिक प्रस्ताव खोल्नुअघि नै त्यससम्बन्धी कागजातहरु परिवर्तन गरी मिलेमतो गरेको पाइएको हो ।

त्यस्तै पक्राउ पर्नेहरुमा धनकुटा पाख्रीबासका ३३ वर्षीय दिवाकर देउजा,बझाङ दुर्गाथलीका २५ वर्षीय भरत धामी,तनहुँ बन्दीपुरका ३९ वर्षीय संजय भट्ट,काठमाडौँको बानेश्वरका ३५ वर्षीय भाष्कर राज अर्याल,मकवानपुरका ४० वर्षीय सागर कटुवाल र सुनसरी दुहबीका ६२ वर्षीय जीवन कुमार दास रहेका छन् ।

यस्तै प्रहरीले घटनाको थप अनुसन्धान गरिरहेको र यसमा संलग्न अन्य व्यक्तिहरुको खोजी कार्य जारी रहेको जनाएको छ ।रातोपाटी