सिरहा । सिरहा कारागारमा कैदीहरूले अझै प्रदर्शन जारी राखेका छन् । जिल्ला सुरक्षा समितिले सोमबार कारागारबाट नाइके इन्द्रजित यादवसहित १३ जनालाई बाहिर निकालेपछि सुरु भएको प्रदर्शन अझै नरोकिएको हो ।

अनुगमनका क्रममा कारागारभित्रबाट एक थान कटुवा पेस्तोल, दुई राउन्ड गोली, नगद १ लाख २० हजार रुपैयाँ, चुरोट, सुर्ती लगायतका कुरा भेटिएपछि उनीहरूलाई नियन्त्रणमा लिइएको थियो । उनीहरूलाई जिल्ला प्रहरी कार्यालय, सिरहाको हिरासतमा राखेर अनुसन्धान भइरहेको छ ।

तर,उनीहरुलाई कारागारबाट निकालेर प्रहरी हिरासतमा ल्याइएसँगै नाइके यादव निकट कैदीहरूले कारागारभित्र आगजनी गर्दै प्रदर्शन थालेका थिए । सुरक्षाकर्मीले सोमबार बेलुकी पानीको फोहोरा हालेर आगो नियन्त्रणमा लिए पनि उनीहरू रातभर कारागारभित्र प्रदर्शन गरे ।

त्यस्तै कारागारभित्र तोडफोड गर्ने, ढुंगा, भाँडाकुँडा,पानी लगायत बाहिर फाल्ने, गाली गर्ने काम उनीहरूले गरिरहेका छन् । उनीहरूले अप्रिय घटना घटाउने सक्ने भन्दै कारागार बाहिर हिजैदेखि नेपाल प्रहरीसहित सशस्त्र प्रहरी र नेपाली सेना गरी तीनै निकायका सुरक्षाकर्मी परिचालन गरिएको छ ।

त्यस्तै यता,प्रशासनले भने कारागारमा बल प्रयोग गर्ने तयारी गरेको छ । बल प्रयोग गरी यसमा संलग्नहरूलाई नियन्त्रणमा लिने र कारागार सरुवा गर्ने तयारीमा प्रशासनले गरेको हो । ‘उनीहरु अनावश्यक रूपमा बदमासी गर्दैछन्,’ सिरहाका प्रमुख जिल्ला अधिकारी सुरेन्द्र पौडेलले भने, ‘हामी क्रियाको प्रतिक्रिया दिन्छौं ।’

यस विषयमा कसरी अगाडि बढ्ने र स्थितिलाई कसरी नियन्त्रणमा लिने भन्ने विषयमा निर्णय लिन अहिले जिल्ला सुरक्षा समितिको बैठक पनि बोलाइएको प्रजिअ पौडेलले जानकारी दिए ।इकान्तीपुर