lms

दाङ । तुलसीपुरमा पछिल्लो समय खाद्य तथा किराना व्यवसायीहरुमा सुधार देखिन थालेको छ । तुलसीपुर उपमहानगरपालिकाको उपभोक्ता हित संरक्षण शाखा तथा खाद्य प्रविधि तथा गुण नियन्त्रण डिभिजन कार्यालय तुलसीपुरले बजार अनुगमनलाई तीव्रता दिएसँगै खाद्य सुरक्षाको अवस्थामा सकारात्मक परिवर्तन देखिएको हो ।

अनुगमनका क्रममा यसअघि म्याद नाघेका खाद्यवस्तु,अखाद्य वस्तुको मिसावट, रंग मिसाइएको खानेकुरा,उत्पादन तथा उपभोग्य मिति नाघेका सामग्री,लेबल नलगाइएका वस्तुजस्ता समस्या व्यापक देखिँदै आएको भएपनि पछिल्लो समय व्यवसायी र उपभोक्ता दुवै सचेत बन्दै जाँदा केही सुधार आएको खाद्य निरीक्षक सुदर्शन गोसाईले जानकारी दिए ।

आज पनि तुलसीपुरका विभिन्न मार्ट तथा होटलहरुमा छड्के अनुगमन गरिएको छ । तुलसीपुरस्थित तुलसी मार्ट,नायक मार्ट र पलाउ मार्टमा गरिएको अनुगमनका क्रममा अधिकांश मार्टमा अघिल्ला दिनको तुलनामा उल्लेख्य सुधार देखिएको भएपनि तुलसी मार्टमा भने ३ हजार ५ सय रुपैयाँ बराबरको म्याद नाघेको पेय पदार्थ (स्प्राइट) फेला परेपछि नष्ट गरिएको छ ।

यसैगरी पलाउ रेष्टुरेन्ट,पलाउ फ्रेस हाउस,बर्गर हाउस एण्ड चिकेन स्टेशन,पार्टी फालो रेष्टुरेन्ट तथा कोको भ्यु फेमिली रेष्टुरेन्टमा पनि अनुगमन गरिएको थियो । अनुगमनका क्रममा अधिकांश रेष्टुरेन्टको भान्सामा सरसफाइ तथा व्यवस्थापनमा कमजोरी भेटिएको छ भने पलाउ रेष्टुरेन्टमा अघिल्लो अनुगमनको तुलनामा केही सुधार देखिएको खाद्य निरीक्षक गोसाईले बताए । त्यसैगरी केही रेष्टुरेन्टमा रंग प्रयोग गरिएको खानेकुरा तथा पटक–पटक तताइएर गुणस्तर बिग्रिएको तेल फेला परेपछि तत्काल नष्ट गरिएको छ ।

साथै,दर्ता नवीकरण नगरेका केही व्यवसायीलाई समयमै पालिकामा दर्ता नवीकरण गर्न आग्रह गरिएको छ भने कैफियत भेटिएका व्यवसायीलाई तत्काल सुधार गरी उपभोक्ताको स्वास्थ्यप्रति गम्भीर बन्न निर्देशन दिइएको छ । आजको बजार अनुगमन कार्यक्रममा खाद्य प्रविधि तथा गुण नियन्त्रण डिभिजन कार्यालय तुलसीपुर, तुलसीपुर उपमहानगरपालिका उपभोक्ता हित संरक्षण शाखा,बजार व्यवस्थापन शाखा,नगर प्रहरी तथा पत्रकार लगायतको सहभागिता रहेको थियो ।तुलसीपुरखबर