दाङ । नेपाली काङ्ग्रेसको शुभेच्छुक संस्था नेपाल सांस्कृतिक महासंघले लमहीमा नगर स्तरीय कार्यसमिति चयन गरेको छ ।

जस्को अध्यक्षमा उषा दशौदी, उपाध्यक्षमा पोषण भण्डारी,सचिवमा प्रिया स्मृती गजमेर, कोषाध्यक्षमा वर्षा वली,सह-सचिवमा सुशिला डाँगी रहेका छन् । त्यसैगरी सिमा चौधरी,पवन बस्याल,छायाँ बुढाथोकी र सुष्मा नेपाली सदस्य रहेका छन् ।

नेपाल सांस्कृतिक महासंघ लमही नगर स्तरीय प्रथम अधिवेशनमा बोल्दै नेपाली कांग्रेस लमही नगर सभापति सन्तोष बुढाथोकीले नेपाली कांग्रेसका भातृसंगठनमध्ये पार्टीलाई ऊर्जाशील बनाउन सक्ने संस्था नै नेपाल सांस्कृतिक महासंघ भएको बताए ।

सोमबार लमहीमा सम्पन्न प्रथम नगर स्तरीय अधिवेशनलाई सम्बोधन गर्दै सभापति बुढाथोकीले कलाका विभिन्न क्षेत्रमा क्रियाशील कलाकर्मीको संस्था नेपाल सांस्कृतिक महासंघको नेपाली कांग्रेसभित्र अन्य भातृ संघसंस्थाको भन्दा मूल्य र मान्यता ठुलो रहेको उनको भनाई छ ।

कार्यक्रममा नेपाल सांस्कृतिक महासंघ लमही नगर समितिका सल्लाहकार, संगीतकार तथा गायक यादव योगीले संगठन सुदृढीकरण, सांस्कृतिक पहिचान संरक्षण तथा सामाजिक सद्भाव कायम राख्न महासंघले महत्वपूर्ण भूमिका खेल्न सक्नु पर्ने बताए ।

नेपाल सांस्कृतिक महासंघ लमही नगरका पुर्व अध्यक्ष ज्ञानेन्द्र स्वर्णकारले सांस्कृतिक जागरण र नेपाली कांग्रेसको विचारलाई स्थानीय स्तरसम्म विस्तार गर्न नयाँ कार्यसमिति सक्रिय रूपमा लाग्ने धारणा व्यक्त गरे ।

नेपाल सांस्कृतिक महासंघ लमही नगरका नवनिर्वाचित अध्यक्ष उषा दशौदीले संगठनलाई सशक्त र प्रभावकारी बनाउन प्रतिबद्धताका साथ अगाडि बढ्ने बताइन् ।

स्थानीय स्तरमा संगठन विस्तार तथा सांस्कृतिक गतिविधिलाई सशक्त बनाउने उद्देश्य लिएको छ । नयाँ कार्यसमिति गठनसँगै, लमही नगर स्तरीय महासंघले आगामी दिनमा आफ्नो गतिविधि थप सक्रिय बनाउने लक्ष्य लिएको छ ।