काठमाडौं । नेपाली काङ्ग्रेसले वरिष्ठ नेता रामचन्द्र पौडेललाई राष्ट्रपतिको उम्मेदवार बनाउने निर्णय गरेको छ । पार्टी कार्यालय सानेपामा बसेको कांग्रेस कार्यसम्पादन समितिको बैठकले पौडेललाई उम्मेदवार बनाउने निर्णय गरेको कांग्रेस प्रवक्ता डा.प्रकाशशरण महतले जानकारी दिएका छन ।

त्यस्तै बैठकमा पार्टी सभापति शेर बहादुर देउवाले पौडेलको नाम प्रस्ताव गरेका थिए । नेपालको संविधानको रक्षा र गणतन्त्रको सुदृढिकरणका लागि काङ्ग्रेसको उम्मेद्वारलाई बिजयी गराउन सवै दललाई अनुरोध गरेको छ भने बैंशाख १० गते हुने चितवन–२ मा हुने उपनिर्वाचनमा पार्टीका तर्फबाट खडा गर्ने उम्मेद्वारलाई औपचारिक पत्र दिने जिम्मेवारी पार्टी सभापतिलाई दिने निर्णय भएको प्रवक्ता महतले बताए ।

यस्तै काङ्ग्रेसका बरिष्ठ नेता पौडेलले संविधानलाई संस्थागत गर्नको निम्ति राष्ट्रपतिमा आफ्नो उम्मेदवारी रहेको जानकारी दिएका छन् । उनले पार्टीले आफुलाई न्याय गरेको र पदको गरिमा कायम राख्ने जिकिर गरेका छन् ।

दलहरुबीच भएको पछिल्लो सहमति अनुसार काङ्ग्रेस–माओवादीसहित ८ दलीय गठबन्धन बनेको छ । जसअनुसार राष्ट्रपतिमा काङ्ग्रेसका उम्मेदवारलाई समर्थन गर्ने सहमति भएको थियो ।