दाङ । वैशाख ३० गते हुन लागेको स्थानीय तहको निर्वाचनका लागि देउखुरी क्षेत्रमा रहेका मतदान केन्द्रको स्थलगत निरीक्षण गरिएको छ । दाङका प्रमुख निर्वाचन अधिकृत रितेन्द्र थापाको नेतृत्वमा जिल्ला सुरक्षा समिति दाङका अध्यक्ष एवम् प्रमुख जिल्ला अधिकारी हिरालाल रेग्मी लगायतको टोलीले सोमबार राजपुर गाउँपालिकामा रहेका विभिन्न मतदान केन्द्रहरूको अवलोकन गरिएको हो ।

टोलीले यसअघि गढवा गाउँपालिकामा रहेका मतदान स्थलहरुको निरीक्षण तथा अवलोकन गरि सकेको छ । सोमबार राजपुर गाउँपालिका वडा नम्बर १ मा रहेको ज्याती आधारभूत विद्यालयमा गुरुङ्खोला, बाल जनता मा. वि कटबेरु, जनज्याती मा.वि बेला, शंकर आधारभूत विद्यालय खरदरिया, आधारभूत विद्यालय दुलैया, दिब्यज्योती प्रा.वि जंग्रहवा, रात्री प्रा.वि गंगदी र आधारभुत विद्यालय सिक्टा मतदान केन्द्रको स्थलगत अवलोकन गरेको इलाका प्रहरी कार्यालय गढवाका प्रमुख अञ्जु केसीले जानकारी दिईन।

जिल्ला सुरक्षा समितिले मतदान केन्द्रको भौतिक अवस्था, सुरक्षा स्थिति लगायतका विषयमा जानकारी पनि लिएको दाङका प्रमुख जिल्ला अधिकारी हिरालाल रेग्मीले बताए । रेग्मीका अनुसार निर्वाचनलाई भयरहित, विश्वसनीय बनाउन र जनतालाई आफ्नो मताधिकारबाट बञ्चित नगराउन मतदान केन्द्रको सुरक्षा अवस्था सम्बन्धी जानकारी लिएको जानकारी दिए ।

टोलीमा दाङका प्रमुख निर्वाचन अधिकृत रितेन्द्र थापाको नेतृत्वमा जिल्ला सुरक्षा समिति, दाङका अध्यक्ष एवम् प्रमुख जिल्ला अधिकारी हिरालाल रेग्मी, दाङका प्रहरी प्रमुख सुरेशप्रसाद काफ्ले, राष्ट्रिय अनुसन्धान दाङका प्रमुख अर्जुन भण्डारी, नेपाली सेना दाङका प्रमुख सेनानी रविन्द्र महर्जन, सशस्त्र प्रहरी बल नं. २९ हेक्वा ज्वालामाइ गण भालुवाङका प्रमुख बिनोद केसी लगायतको उपस्थिती रहेको थियो ।

दाङमा अहिले एकसय ५३ वटा मतदान केन्द्र रहेका छन् । अनुगमन गरिएका आधारमा हालसम्म ती सबै केन्द्रको अवस्था सन्तोषजनक रहेको छ ।