काठमाडौँ । सरकारले आज बिहानैदेखि रसुवाको भोटेकोशी नदीमा आएको भीषण बाढीपछि प्रभावित क्षेत्रहरुमा खोजी,उद्धार तथा राहत कार्यलाई तीव्रता दिएको छ ।

बाढीले ठुलो क्षति पुर्‍याएपछि तटीय क्षेत्र र प्रभावित बस्तीहरूमा राज्यका सम्पूर्ण संयन्त्र परिचालन गरिएको प्रधानमन्त्री कार्यालयले जनाएको छ । जोखिममा परेका नागरिकहरूको तत्काल सहायताका लागि नेपाली सेनाको टोलीले प्रभावित क्षेत्रमा पुगेर आवश्यक खाद्यसामग्री, टेन्ट र औषधिजस्ता राहत सामग्री वितरण गरिसकेको छ । सेनाको टोलीले प्रतिकूल मौसम र रातको समयमा पनि स्थल मार्गबाट उद्धार कार्यलाई निरन्तरता दिएको थियो ।

त्यस्तै,आज बिहानैदेखि टिमुरे, स्याफ्रुबेँसी र नदी तटीय क्षेत्रहरुमा खोजी र उद्धार कार्यलाई थप सशक्त बनाइएको छ । बेपत्ता भएकाहरुको खोजीका लागि हेलिकोप्टर र पैदल टोली दुवैलाई सक्रिय रुपमा परिचालन गरिएको छ ।

सरकारले भोटेकोशी र अन्य नदी किनारामा बसोबास गर्ने बासिन्दाहरुलाई उच्च सतर्कता अपनाउन विशेष आग्रह समेत गरेको छ । बाढी र पहिरोको जोखिम अझै कायम रहन सक्ने भन्दै सुरक्षित स्थानमा रहन र सरकारी संयन्त्रको सम्पर्कमा रहन सूचित गरिएको छ । राहत र उद्धार कार्यमा कुनै कसर बाँकी नराख्ने सरकारले प्रतिबद्धता समेत जनाएको छ ।