दाङ । लुम्बिनी प्रदेशको मुख्यमन्त्रीमा चेतनारायण आचार्यलाई नै निरन्तरता दिइने भएको छ । एमाले र नेपाल कम्युनिष्ट पार्टी (नेकपा) बीच सत्ता सहकार्यको सहमति भएपछि मुख्यमन्त्री परिवर्तन हुने चर्चा चलेपनि आचार्यलाई नै नेतृत्वमा निरन्तरता दिने सहमति भएको हो ।

त्यस्तै,स्रोतका अनुसार एमाले अध्यक्ष केपी शर्मा ओली,पार्टी उपाध्यक्ष विष्णु पौडेल,महासचिव शंकर पोख्रेल,मुख्यमन्त्री चेतनारायण आचार्य र पूर्व मुख्यमन्त्री लिला गिरीबीच भक्तपुरको गुण्डुमा भएको छलफलले आचार्यलाई नै मुख्यमन्त्रीमा निरन्तरता दिने निष्कर्ष निकालेको जनाइएको छ ।

यससँगै एमाले र नेकपाबीच मन्त्रालयको वाँडफाँड, मन्त्रीहरूको जिम्मेवारी तथा सरकारको साझा कार्ययोजनाबारे औपचारिक छलफल अघि बढ्ने भएको छ । मन्त्रालयको संख्या पुनर्संरचना भइसकेकाले दुवै दलबीच कुन मन्त्रालय कसले लिने भन्ने विषयमा गृहकार्य सुरु हुने जनाइएको छ ।
हाल प्रदेश सरकारमा मुख्यमन्त्री आचार्यसहित एमालेका पाँच जना मन्त्री छन् ।

नेपाली काङ्ग्रेसले सरकारलाई दिएको समर्थन फिर्ता लिएपछि काङ्ग्रेसका मन्त्रीहरूले राजीनामा दिएका थिए । त्यसपछि एमाले र नेकपाले नयाँ सत्ता समीकरण बनाउने सहमति गरेका हुन् । सहमति अनुसार अब नेकपाबाट सरकारमा सहभागी हुने मन्त्रीहरुको टुंगो लगाइनेछ भने मन्त्रिपरिषद पुनर्गठन केही दिनभित्रै हुने तयारी छ ।