काठमाडौँ । देशका विभिन्न स्थानमा रहेका मुख्य राजमार्गहरु बाढी र पहिरोका कारण अवरुद्ध भएका छन् ।

नेपाल प्रहरीको पछिल्लो विवरण अनुसार उपत्यका जोड्ने प्रमुख सडकका साथै कोशी र बागमती प्रदेशका कयौँ सडक खण्डहरू पूर्ण वा आंशिक रूपमा प्रभावित भएका छन् । काठमाडौँ भित्रिने र बाहिरिने मुख्य लाइफलाइन मानिने नागढुंगा-मुग्लिन सडक खण्ड बाढीको सम्भावित जोखिमका कारण पूर्ण रूपमा बन्द गरिएको छ । भाद्र १० गते बिहान १०:०० बजेदेखि नै यो सडक खण्डमा सवारी आवागमनमा रोक लगाइएको हो ।

त्यस्तै,बागमती प्रदेशमा धेरैजसो राजमार्गहरूमा बाढी र पहिरोको जोखिमका कारण सवारी सञ्चालनमा प्रतिबन्ध लगाइएको छ । बिपी राजमार्गको खुर्कोट-नेपालथोक-कटुञ्जेबेँसी खण्डमा साँझ १८:०० बजेदेखि बिहान ०४:०० बजेसम्म सवारी साधन सञ्चालनमा पूर्ण रोक लगाइएको छ। दिउँसोको समयमा भने परिस्थितिको विचार गरेर मात्र सवारी चल्न दिइनेछ ।

कान्ति लोकपथकाे हेटौँडा । ठिङ्गन-बागमती- ललितपुर सडक खण्डमा रातको समयमा (साँझ १७:०० देखि बिहान ०५:०० सम्म) सवारी सञ्चालनमा रोक लगाइएको छ । त्रिशूली-मैलुङ- स्याफ्रुबेँसी सडक खण्डको उत्तरगया-५,खाल्टेमा आएको बाढीका कारण यो बाटो लामो समयदेखि पूर्ण रूपमा अवरुद्ध छ । यस्तै, नुवाकोट जाने टोखा-छहरे सडक खण्डमा रातको समयमा सवारी चलाउन रोक लगाइएको छ । साथै,जिल्लाका अन्य मुख्य राजमार्गहरु पनि बाढीका कारण पूर्ण रुपमा अवरुद्ध रहेका छन् ।

इलामको मेची राजमार्ग अन्तर्गत राजदुवाली क्षेत्रमा अविरल वर्षाका कारण सडक पूर्ण रुपमा अवरुद्ध भएको छ । यद्यपि, झापादेखि ताप्लेजुङ जाने यात्रुहरुका लागि वैकल्पिक बाटो उपलब्ध रहेको प्रहरीले जनाएको छ । प्रहरीले यात्रामा निस्कनु अघि सडकको पछिल्लो अवस्थाबारे नजिकको प्रहरी कार्यालयमा जानकारी लिन र जोखिमपूर्ण मौसममा यात्रा गर्दा सावधानी अपनाउन सर्वसाधारणलाई आग्रह गरेको छ ।