दाङ । तुलसीपुर उपमहानगरपालिका वडा नम्बर १० बनगाउँका एक युवक मृत फेला परेका छन् । स्थानीय २८ वर्षीय राजेन्द्र केसी घर नजिकै आफ्नै मोटरसाइकलसहित दुर्घटनामा परेको अवस्थामा मृत फेला परेको इलाका प्रहरी कार्यालय तुलसीपुरका प्रमुख डिएसपी होमबहादुर पराजुलीले बताए ।

डिएसपी पराजुलीका अनुसार उनी आफ्नै आफ्नै रा ३ ख ५००४ नम्बरको मोटरसाइकल सडक किनारमा खुट्टा च्यापेर लडेको अवस्थामा फेला परेको थियो । ‘छिमेकीको घरको भित्तामा ठोकिएर गेटमा लागेपछि उनी सडक किनारमा पल्टिएको अनुमान छ,’ डिएसपी पराजुलीले भने, ‘हेलमेट पनि नलगाएकाले दुर्घटना गम्भीर भएको देखियो।’

प्रहरीले राति सवा ११ बजेतिर उनी घर नजिकै दुर्घटनामा परेको भएपनि कसैले थाहा नपाएको बताएको छ । बिहानीपख दूध बेच्ने आउनेहरुले देखेपछि प्रहरीलाई खबर गरिदिएको थियो ।

परिवारका एक्ला सन्तान उनी अटो चलाउँथे

पेट्रोल सकिएपछि पेट्रोल ल्याउन भनेर उनी घरबाट आफ्नै मोटरसाइकल लिएर सुकौरा पुगेर फर्किने क्रममा घर नजिकै दुर्घटनामा परेका थिए । मृतकको शव पोस्ट मर्टमका लागि तुलसीपुरस्थित राप्ती प्रादेशिक अस्पतालमा राखिएको छ । उक्त घटनाबारे थप अनुसन्धान भइ रहेको प्रहरीले जनाएको छ ।सेतोपाटी