दाङ । ‎दाङ जिल्लाको तेक्वान्दो इतिहासमा नयाँ कीर्तिमान कायम गर्दै गढवा गाउँपालिका–६ निवासी बसन्ती चौधरी जिल्लाकै पहिलो ५ डान ब्ल्याक बेल्ट प्राप्त गर्ने महिला तेक्वान्दो खेलाडी तथा प्रशिक्षक बन्न सफल भएकी छन् ।
‎
‎‎नेपाल तेक्वान्दो संघको आयोजना तथा विश्व तेक्वान्दोको मान्यता अनुसार सञ्चालन गरिएको राष्ट्रिय क्योरुगी तेक्वान्दो रेफ्री सेमिनार तथा रिफ्रेसर कोर्स–२०२६ का क्रममा उनले पाँचौं डानको सफलता हासिल गरेकी हुन्।
‎
‎लामो समयदेखि तेक्वान्दो खेलमा सक्रिय चौधरीले आफ्नो निरन्तर मेहनत, अनुशासन, समर्पण र लगनशीलताका कारण यो ऐतिहासिक उपलब्धि हासिल गरेकी हुन्। उनको यस सफलताले दाङ जिल्लाको खेलकुद क्षेत्रमा नयाँ ऊर्जा थप्नुका साथै महिला खेलाडीहरूलाई पनि प्रेरणा प्रदान गरेको छ।
‎
‎स्थानीय खेलप्रेमी, खेलकुदकर्मी तथा विभिन्न संघसंस्थाका प्रतिनिधिहरूले चौधरीलाई बधाई तथा शुभकामना व्यक्त गर्दै आगामी दिनमा अझ उच्च सफलता हासिल गर्न शुभेच्छा दिएका छन्।
‎
‎बसन्ती चौधरीको यो उपलब्धि दाङ जिल्लाका लागि गौरवको विषय बनेको छ । उनको सफलताले जिल्लामा तेक्वान्दो खेलको विकास र महिला सहभागिता वृद्धि गर्न महत्वपूर्ण योगदान पुग्ने विश्वास गरिएको छ ।
‎
‎