काठमाडौँ । नेपाल विद्युत् प्राधिकरण सञ्चालक समितिको बैठकले २० अर्ब रुपैयाँ बराबरको ऊर्जा बण्ड निष्कासन गर्ने निर्णय गरेको छ ।

आइतबार ऊर्जा मन्त्रालयमा बसेको प्राधिकरण सञ्चालक समितिको बैठकले मन्त्रिपरिषदबाट ऊर्जा बण्ड जारी गर्न पाएको स्वीकृतअनुसार सो निर्णय गरेको हो ।

त्यस्तै असोज २३ गते बिहीबार बसेको मन्त्रिपरिषद् बैठकले जलविद्युत आयोजना निर्माणका लागि स्रोत व्यवस्थापन गर्न २० अर्ब रुपैयाँ बराबरको ऊर्जा ऋणपत्र निष्कासन गर्न स्वीकृति दिएको थियो । प्राधिकरण स्रोतका अनुसार ठुला आयोजनाहरूमा लगानी गर्ने गरी प्राधिकरण बोर्डले २०अर्ब रुपैयाँ बराबरको ऊर्जा बण्ड निष्कासन गर्ने निर्णय गरेको छ ।

यस्तै मन्त्रिपरिषदले ऊर्जा बण्ड निष्कासनको स्वीकृतमा नै प्राधिकरणलाई उठाइने रकम पुँजीगत खर्चमा प्रयोग गर्नुपर्ने स्पष्ट सर्त तोकेको थियो । उक्त सर्तअनुसार कार्यान्वयन गर्ने गरी प्राधिकरण बोर्डले निर्णय गरेको स्रोतले जानकारी दिएको छ । स्रोतले भन्यो, ‘आइतबार बोर्ड बैठकले निर्णय गरेको छ । तर कार्यान्वयनका लागि निर्णयमा हस्ताक्षर भएर आएको छैन ।’

त्यस्तै ऊर्जा बण्डमार्फत उठाइने २० अर्ब रुपैयाँमध्ये ८ अर्ब रुपैयाँ माथिल्लो अरुण जलविद्युत् आयोजना (१०६३ मेगावाट) मा, ५ अर्ब रुपैयाँ चैनपुर सेती जलविद्युत् आयोजना (२१० मेगावाट) मा, ५ अर्ब रुपैयाँ नै तामाकोसी पाँचौँ जलविद्युत् आयोजना (९४.८ मेगावाट) मा तथा २ अर्ब रुपैयाँ निर्माणाधीन माथिल्लो मोदी ‘ए’ (४२ मेगावाट) जलविद्युत् आयोजनामा खर्च गर्ने योजना रहेको स्रोतको दाबी छ ।

माथिल्लो अरुण जलविद्युत् आयोजना (१०६३ मेगावाट) आयोजना स्वदेशी लगानीमा बनाउने ऊर्जा मन्त्री कुलमान घिसिङले घोषणा गरिसकेका छन् । उक्त आयोजनाको लागि विश्व बैंकले विगत १५ वर्षदेखि लगानीको लागि आग्रह गर्दा पनि लगानी जुट्न सकेको छैन ।

त्यस्तै ऊर्जा बण्डको वार्षिक ब्याजदर ५.५ प्रतिशत रहनेछ । बण्ड निष्कासनका लागि धितोपत्र बोर्डबाट अनुमति लिनुपर्ने व्यवस्थाअनुसार कुल निष्कासन हुने रकमको ०.१२ प्रतिशत शुल्क तिर्नुपर्नेछ । प्राधिकरणले छिट्टै धितोपत्र बोर्डमा निवेदन दिएर निष्कासन प्रक्रिया अघि बढाउने तयारी गरेको छ ।रातोपाटी